തിരുവനന്തപുരം: മഞ്ചേരി മെഡിക്കല്‍ കോളജിനോടുള്ള സര്‍ക്കാര്‍ അവഗണന സഭ നിര്‍ത്തിവെച്ച് ചര്‍ച്ച ചെയ്യണമെന്ന് ആവശ്യപ്പെട്ട് പ്രതിപക്ഷം അടിയന്തര പ്രമേയത്തിന് നോട്ടിസ് നല്‍കി. എം.ഉമ്മര്‍ എം.എല്‍.എയാണ് നോട്ടിസ് നല്‍കിയത്.

മഞ്ചേരി മെഡിക്കല്‍ കോളജിന് അടിസ്ഥാന സൗകര്യങ്ങള്‍ ഏര്‍പ്പെടുത്തുന്നതില്‍ സര്‍ക്കാരിന് വീഴ്ച്ച പറ്റിയെന്നും ഈ പ്രശ്‌നം സഭ നിര്‍ത്തിവെച്ച് ചര്‍ച്ച ചെയ്യണമെന്നും ആവശ്യപ്പെട്ടായിരുന്നു അടിയന്തര പ്രമേയം.

വിവിധ വകുപ്പുകളില്‍ ആവശ്യത്തിന് അധ്യാപകരില്ല, അക്കാദമിക് ബ്ലോക്ക്, സ്റ്റാഫ് ക്വാര്‍ട്ടേഴ്‌സ്, വിദ്യാര്‍ത്ഥികളുടെ ഹോസ്റ്റല്‍ തുടങ്ങിയ അടിസ്ഥാന സൗകര്യങ്ങള്‍ ഇല്ലാത്തത് തുടങ്ങിയവ എം ഉമ്മര്‍ ചൂണ്ടിക്കാട്ടി. വിദ്യാര്‍ഥി സമരം നാല് ദിവസം പിന്നിട്ടിട്ടും സര്‍ക്കാര്‍ നടപടി സ്വീകരിക്കുന്നില്ലെന്നും പ്രതിപക്ഷം കുറ്റപ്പെടുത്തി.

എന്നാല്‍ മുന്‍ സര്‍ക്കാര്‍ വേണ്ടത്ര ജാഗ്രതയില്ലാതെ മെഡിക്കല്‍ കോളേജ് ആരംഭിച്ചതാണ് നിലവിലെ പ്രശ്‌നങ്ങള്‍ക്ക് കാരണമെന്ന് ആരോഗ്യമന്ത്രി കെ കെ ശൈലജ മറുപടി നല്‍കി.