നെടുമ്പാശ്ശേരി: നെടുമ്പാശ്ശേരിയില്‍ നിന്നും കാര്‍ തട്ടിയെടുത്ത കേസില്‍ നാല് പേര്‍ കൂടി പൊലിസിന്റെ പിടിയിലായി. പിടിയിലായവരില്‍ ഒരു യുവതിയും ഉള്‍പ്പെടും. കാര്‍ വില്‍പനക്കായി ഓണ്‍ ലൈനില്‍ പരസ്യം നല്‍കിയ നായത്തോട് സ്വദേശിയെ കബളിപ്പിച്ച് സംഘം കാര്‍ തട്ടിയെക്കുകയായിരുന്നു.
ഷാഡോ പൊലീസ് ചമഞ്ഞ് യുവാവിനെ തട്ടിക്കൊണ്ടുപോയി പത്തുലക്ഷം കവര്‍ന്നകേസില്‍ ചാവക്കാട് ജയിലില്‍ കഴിയുന്ന നെടുമങ്ങാട് പറക്കോണം അരശുപറബ് ആസിയ മന്‍സില്‍ നിഷാദ് , തിരുവനന്തപുരം കല്ലയം മഞ്ഞാംകോട് കോളനി സുമേഷ് ഭവനില്‍ കല്‍പ്പന, തിരുവനന്തപുരം വള്ളകടവ് ഈഞ്ചക്കല്‍ കീഴെ കോളനിയില്‍ ഷഫീഖ്, തിരുവനന്തപുരം ആറ്റിന്‍കര മരപാലം പുതുവല്‍ പുരയിടത്തില്‍ സുമേഷ് എന്നിവരെയാണ് ഇന്നലെ അങ്കമാലി കോടതിയുടെ അനുമതിയോടെ അറസ്റ്റ് ചെയ്തത്.
ഇവരെ ഇന്നലെ കസ്റ്റഡിയില്‍ വാങ്ങി ചോദ്യം ചെയ്ത ശേഷം തിരികെ കോടതിയില്‍  ഹാജരാക്കി റിമാന്‍ഡ് ചെയ്തു. കുഴല്‍പണം തട്ടിയ കേസില്‍ ചാവക്കാട് പൊലീസ് ചോദ്യം ചെയ്തപ്പോഴാണ് നെടുമ്പാശ്ശേരിയില്‍ യുവാവിനെ കബളിപ്പിച്ച് കാര്‍ തട്ടിയെടുത്തവരാണെന്ന് വ്യക്തമായത്.