ദുബൈ: ഏഷ്യാകപ്പ് ക്രിക്കറ്റിലെ സൂപ്പര്‍ ഫോര്‍ മത്സരത്തില്‍ അഫ്ഗാനിസ്ഥാന്‍ പാകിസ്താനെതിരേ മികച്ച നിലയില്‍. നിശ്ചിത ഓവറില്‍ ആറ് വിക്കറ്റ് നഷ്ടത്തില്‍ അഫ്ഗാനിസ്താന്‍ 257 റണ്‍സെടുത്തു. ടോസ് നേടിയ അഫ്ഗാനിസ്താന്‍ ബാറ്റ് ചെയ്യാന്‍ തീരുമാനിക്കുകയായിരുന്നു.
ഹസ്മത്തുള്ള ഷഹീദിയുടെയും അസ്ഗര്‍ അഫ്ഗാനിന്റെയും ബാറ്റിങ് കരുത്തിലാണ് പാകിസ്താനെതിരേ അഫ്ഗാന്‍ മികച്ച സ്‌കോര്‍ പടുത്തുയര്‍ത്തിയത്. 10.1 ഓവറില്‍ 21ന്2 എന്ന സ്ഥിതിയില്‍നിന്ന് മെല്ലെയെങ്കിലും അഫ്ഗാനിസ്ഥാനെ മുന്നോട്ട് നയിച്ചത് റഹ്മത്ഷായും(36) ഹസ്മത്തുള്ള ഷഹീദിയും ചേര്‍ന്നാണ്. റഹ്മത് ഷാ പുറത്തായ ശേഷം അസ്ഗര്‍ അഫ്ഗാന്‍ ക്രീസിലെത്തിയപ്പോഴായിരുന്നു അഫ്ഗാനിസ്ഥാന്‍ ഇന്നിങ്‌സിനു വേഗത കൈവന്നത്.56 പന്തില്‍ നിന്ന് അഞ്ച് സിക്‌സും രണ്ട് ഫോറും ഉള്‍പ്പെടെ 67 റണ്‍സാണ് അസ്ഗര്‍ നേടിയത്. താരത്തെ പുറത്താക്കി ഷഹീന്‍ അഫ്രീദി തന്റെ കന്നി ഏകദിന വിക്കറ്റ് സ്വന്തമാക്കി. മുഹമ്മദ് നബിയെയും അഫ്രീദി തന്നെ പുറത്താകുകയായിരുന്നു.
ഏഴാം വിക്കറ്റില്‍ ഹസ്മത്തുള്ള ഷഹീദിയും ഗുല്‍ബാദിന്‍ നൈബും ചേര്‍ന്ന് 45 റണ്‍സ് നേടിയതും അഫ്ഗാന്‍ ഇന്നിങ്‌സില്‍ വഴിത്തിരിവായി. അവസാന ഓവറുകളില്‍ അടിച്ച് തകര്‍ത്ത് ഹസ്മത്തുള്ള ഷഹീദ് തന്റെ ശതകത്തിനു മൂന്ന് റണ്‍സ് അകലെ വരെയെത്തിയെങ്കിലും അര്‍ഹമായ ശതകം താരത്തിനു നേടാനായില്ല.വ്യക്തിഗത സ്‌കോര്‍ 77ല്‍ നില്‍ക്കെ ഷഹീദിയെ ഹസന്‍ അലി ക്ലീന്‍ ബൗള്‍ഡാക്കിയെങ്കിലും നോബോള്‍ കാരണം ഷഹീദി രക്ഷപ്പെടുകയായിരുന്നു.പാകിസ്താനു വേണ്ടണ്ടി മുഹമ്മദ് നവാസ് മൂന്നും ഷഹീന്‍ അഫ്രീദി രണ്ടണ്ടും ഹസന്‍ അലി ഒരു വിക്കറ്റും സ്വന്തമാക്കി. മറുപടി ബാറ്റിങ്ങിനിറങ്ങിയ പാകിസ്താന്റെ ആദ്യ വിക്കറ്റ് ഒരു റണ്‍സെടുക്കുന്നതിന് മുമ്പ് തന്നെ നഷ്ടമാവുകയായിരുന്നു. അവസാനം വിവരം ലഭിക്കുമ്പോള്‍ 2 വിക്കറ്റിന് 155 റണ്‍സ് എന്ന നിലയിലാണ് പാകിസ്താന്‍.