കോഴിക്കോട്: പന്തീരാങ്കാവ് യു.എ.പി.എ കേസില്‍ അറസ്റ്റിലായിരുന്ന മുന്‍ എസ്.എഫ്.ഐ-ഡി.വൈ.എഫ്.ഐ പ്രവര്‍ത്തകന്‍ അലന്‍ ഷുഹൈബിന്റെ പിതാവ് കെ മുഹമ്മദ് ഷുഹൈബ് ആര്‍.എം.പി സ്ഥാനാര്‍ഥിയായി മത്സരിക്കും. കോഴിക്കോട് കോര്‍പറേഷനിലെ 61ാം വാര്‍ഡായ വലിയങ്ങാടിയിലാണ് സി.പി.എം കുറ്റിച്ചിറ തങ്ങള്‍സ് റോഡ് മുന്‍ ബ്രാഞ്ച് സെക്രട്ടറി കൂടിയായ മുഹമ്മദ് ഷുഹൈബ് സ്ഥാനാര്‍ഥിത്വം പ്രഖ്യാപിച്ചുത്.
പന്തിരാങ്കാവ് മാവോയിസ്റ്റ് കേസില്‍ അലന്‍ അറസ്റ്റിലായ ശേഷം ചില വിമര്‍ശനങ്ങള്‍ ഉന്നയിച്ചിരുന്നെങ്കിലും ഒരിക്കല്‍ പോലും പരസ്യമായി പാര്‍ട്ടിയെ അലന്റെ കുടുംബം തള്ളിപ്പറഞ്ഞിരുന്നില്ല. അതുകൊണ്ടു തന്നെ ഷുഹൈബിന്റെ തീരുമാനത്തെ ഞെട്ടലോടെയാണ് സി.പി.എം കേന്ദ്രങ്ങള്‍ കാണുന്നത്. ഇടതുപക്ഷത്തിന്റെ ജീര്‍ണതക്കെതിരായ പ്രതിഷേധമാണ് തന്റെ സ്ഥാനാര്‍ഥിത്വമെന്ന് ഷുഹൈബ് മാധ്യമങ്ങളോട് പ്രതികരിച്ചു. അലനും താഹയും അടക്കം നിരവധി നിരപരാധികള്‍ പൊലിസ് വേട്ടയ്ക്ക് ഇരയായി. യു.ഡി.എഫ് ഉള്‍പ്പടെയുള്ള പാര്‍ട്ടികളുടെ പിന്തുണ പ്രതീക്ഷിക്കുന്നുവെന്നും ഷുഹൈബ് വ്യക്തമാക്കി.
കേസില്‍ അറസ്റ്റിലാകുന്ന സമയത്ത് സി.പി.എം അംഗമായിരുന്ന അലനെ പിന്നീട് പാര്‍ട്ടി പുറത്താക്കിയിരുന്നു. അതേസമയം രാഷ്ട്രീയമാറ്റത്തെക്കുറിച്ച് ഇപ്പോള്‍ ചിന്തിക്കുന്നില്ലെന്നാണ് അലനോടൊപ്പം അറസ്റ്റിലായിരുന്ന താഹയുടെ കുടുംബത്തിന്റെ പ്രതികരണം. താഹയുടെ കുടുംബത്തിന് വീടുവയ്ക്കാന്‍ കഴിഞ്ഞ മാസമാണ് കെ.പി.സി.സി ധനസഹായം അനുവദിച്ചത്.