നിലമ്പൂര്‍: തെരഞ്ഞെടുപ്പ് രംഗത്തു പുതുചരിത്രം രചിച്ച് ഗുഹാനിവാസിയായ ചോലനായ്ക്കര്‍ വിഭാഗത്തിലെ 21 കാരനും സ്ഥാനാര്‍ഥി. വഴിക്കടവ് ബ്ലോക്ക് ഡിവിഷനില്‍ എല്‍.ഡി.എഫ് സ്വതന്ത്ര സ്ഥാനാര്‍ഥിയായാണ് പുഞ്ചക്കൊല്ലി ഉള്‍വനത്തിലെ അളക്കല്‍ കോളനിയിലെ സി.സുധീഷ് മത്സരിക്കുന്നത്. ചോലനായ്ക്കര്‍ വിഭാഗത്തില്‍ നിന്നു പൊതുതെരഞ്ഞെടുപ്പില്‍ മത്സരിക്കുന്ന ആദ്യത്തെ സ്ഥാനാര്‍ഥി കൂടിയാണ് സുധീഷ്. പ്ലസ്ടു പാസായ സുധീഷ് പ്രചാരണവും തുടങ്ങി. വനത്തില്‍ നിന്നു പുറത്തെത്തി എട്ട് വാര്‍ഡുകള്‍ ഉള്‍പ്പെടുന്ന ഡിവിഷനില്‍ സുധീഷിന്റെ പര്യടനം ചരിത്രത്തിന്റെ ഭാഗമാകും. വംശനാശം സംഭവിച്ചുകൊണ്ടിരിക്കുന്ന ഏഷ്യയിലെ തന്നെ പ്രാക്തന ഗോത്ര നിവാസികളില്‍ അളകളില്‍ (ഗുഹകളില്‍) താമസിച്ചു വന്ന വിഭാഗമാണ് ചോലനായ്ക്കര്‍ വിഭാഗം. ചോലനായ്ക്കരുടെ ആകെ ജനസംഖ്യ 400ല്‍ താഴെയാണ്. മാഞ്ചീരിയിലും പുഞ്ചകൊല്ലിയിലുമാണ് ഇവര്‍ വസിക്കുന്നത്. അധികവും ഗുഹകളിലും അളകളിലുമാണ് താമസം. പ്രാക്തന ഭാഷ സംസാരിക്കുന്ന ഈ വിഭാഗത്തില്‍ ഉയര്‍ന്ന വിദ്യാഭ്യാസം നേടിയവരും വിരളമാണ്.