തിരുവനന്തപുരം: ക്യാബിനറ്റ് പദവിയോടെ ചീഫ് വിപ്പ് സ്ഥാനം ഏറ്റെടുക്കാന്‍ സി.പി.ഐ സംസ്ഥാന എക്‌സിക്യൂട്ടീവ് യോഗം തീരുമാനിച്ചു.
സംസ്ഥാന എക്‌സിക്യൂട്ടീവ് അംഗം കൂടിയായ ഒല്ലൂര്‍ എം.എല്‍.എ കെ. രാജനാണ് ചീഫ് വിപ്പ്. സര്‍ക്കാര്‍ രൂപീകരണവേളയില്‍ ക്യാബിനറ്റ് റാങ്കോടെയുള്ള ചീഫ് വിപ്പ് പദവിയോട് പാര്‍ട്ടി വിയോജിച്ചിരുന്നു.

ബന്ധുനിയമന വിവാദത്തെ തുടര്‍ന്ന് രാജിവച്ച ഇ.പി ജയരാജനെ തിരികെ മന്ത്രിസ്ഥാനത്തേക്ക് കൊണ്ടുവന്നപ്പോള്‍ സി.പി.എമ്മിനോട് ചീഫ് വിപ്പ് സ്ഥാനം ചോദിച്ചുവാങ്ങുകയായിരുന്നു. സംസ്ഥാനം പ്രളയക്കെടുതി നേരിടുമ്പോള്‍ അധിക സാമ്പത്തിക ചെലവ് വരുമെന്നുകണ്ടാണ് ഒരു വര്‍ഷം മുന്‍പ് തീരുമാനിച്ച ചീഫ് വിപ്പ് സ്ഥാനം സി.പി.ഐ ഏറ്റെടുക്കാതിരുന്നത്.
യു.ഡി.എഫ് സര്‍ക്കാരിന്റെ കാലത്ത് ക്യാബിനറ്റ് റാങ്ക് നല്‍കി പി.സി ജോര്‍ജിനെ ചീഫ് വിപ്പ് ആക്കിയതില്‍ ശക്തമായ വിമര്‍ശനം നടത്തിയത് സി.പി.ഐ നേതാക്കളായിരുന്നു. സര്‍ക്കാര്‍ ഖജനാവിലെ പണം ധൂര്‍ത്തടിക്കുന്നുവെന്നായിരുന്നു സി.പി.ഐ നേതാക്കളുടെ ആരോപണം. പ്രളയ പുനര്‍നിര്‍മാണത്തിന് പാടുപെടുന്ന ഈ സമയത്ത് ചീഫ് വിപ്പ് സ്ഥാനം ഏറ്റെടുക്കുന്നതിനെതിരേ യോഗത്തില്‍ വിമര്‍ശനമുയര്‍ന്നു.
സി. ദിവാകരന്‍, ഇ. ചന്ദ്രശേഖരന്‍, മുല്ലക്കര രത്‌നാകരന്‍, സി. ചന്ദ്രന്‍, കെ.ആര്‍ ചന്ദ്രമോഹന്‍ എന്നിവരാണ് വിമര്‍ശനം ഉന്നയിച്ചത്. എന്നാല്‍, ഇവരുടെ വിമര്‍ശനങ്ങളെ തള്ളിയാണ് പദവി ഏറ്റെടുക്കാന്‍ തീരുമാനിച്ചത്.

ഖജനാവിന് ബാധ്യത 7.5 കോടി

തിരുവനന്തപുരം: സംസ്ഥാനത്തെ പുനര്‍നിര്‍മിക്കാന്‍ ഓരോ രൂപയും നിര്‍ണായകമാണെന്ന് ആവര്‍ത്തിക്കുമ്പോഴാണ് വര്‍ഷം 7.5 കോടിയിലേറെ രൂപ ഖജനാവിന് ബാധ്യത വരുത്തുന്ന ചീഫ് വിപ്പ് സ്ഥാനം ഏറ്റെടുക്കാന്‍ സി.പി.ഐ തീരുമാനിച്ചത്. മന്ത്രിമാര്‍ക്ക് ലഭിക്കുന്ന എല്ലാ ആനുകൂല്യങ്ങളും ചീഫ് വിപ്പിന് ലഭിക്കും.
നിയമസഭാ സമ്മേളനം നടക്കുമ്പോള്‍ മാത്രമാണ് ചീഫ് വിപ്പിന്റെ ആവശ്യമുള്ളത്. സര്‍ക്കാരിന് ഭൂരിപക്ഷമുള്ളതിനാല്‍ വിപ്പ് നല്‍കേണ്ട ആവശ്യവുമില്ല.