ശ്രീകാര്യം: സമൂഹത്തെ പ്രാകൃതമായ വ്യവസ്ഥിതിയിലേക്ക് കൊണ്ടുപോകാന്‍ ശ്രമിക്കുന്ന ശക്തികള്‍ക്കെതിരേ പോരാടാന്‍ ഗുരുദേവ സന്ദേശങ്ങള്‍ക്ക് കഴിയണമെന്ന് മന്ത്രി ഇ.പി.ജയരാജന്‍. ഗുരുസന്ദേശങ്ങള്‍ക്ക് സര്‍വദേശീയ തലത്തില്‍ സ്വീകാര്യതയുണ്ടാക്കാന്‍ കൂട്ടായ ശ്രമങ്ങള്‍ നടത്തേണ്ടത് അനിവാര്യമാണ്.
ശ്രീനാരായണ ഗുരുദേവന്റെ ജന്മ ഗൃഹമായ ചെമ്പഴന്തി ഗുരുകുലത്തില്‍ നടന്ന 91-ാമത് ഗുരുദേവ സമാധിദിനാചരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ചാതുര്‍വര്‍ണ്യത്തിന്റെ ദുരന്തം പേറിയ ജനവിഭാഗത്തെ, ഉയര്‍ത്തിക്കൊണ്ടുവരുവാന്‍ പരിശ്രമിച്ച നവോത്ഥാന നായകനായിരുന്നു ശ്രീനാരായണഗുരുദേവന്‍. പിന്നാക്ക ജനവിഭാഗങ്ങള്‍ക്ക് വിദ്യാഭ്യാസത്തിന്റെ വെളിച്ചവും ചിന്തയും പകര്‍ന്ന് സമൂഹത്തിന് മുന്നിലെത്തിക്കാനും ഗുരുവിന്റെ സന്ദേശങ്ങള്‍ക്ക് കഴിഞ്ഞു.
സമൂഹത്തെ ബാധിച്ചിരുന്ന മദ്യപാനത്തിനും ദുരാചാരങ്ങള്‍ക്കും അന്ധവിശ്വാസങ്ങള്‍ക്കുമെതിരെയുള്ള ഗുരുസന്ദേശങ്ങള്‍ ലോകത്തിനാകെ മാതൃകയാണ്. മാനുഷികതയുടെ വിപ്ലവകാരിയായിരുന്നു ശ്രീനാരായണ ഗുരുദേവനെന്ന് ചടങ്ങില്‍ അധ്യക്ഷനായ മന്ത്രി കടകംപള്ളി സുരേന്ദ്രന്‍ അഭിപ്രായപ്പെട്ടു.
മനുഷ്യനുണ്ടാക്കിയ തെറ്റുകള്‍ തുറന്നുകാണിക്കുകയും അതിനെതിരെ ശക്തമായ നിലപാടുകള്‍ സ്വീകരിച്ച് സമൂഹനന്മക്കായി പോരാടുകയും ചെയ്ത ശ്രീനാരായണ ഗുരു യഥാര്‍ത്ഥ സോഷ്യലിസ്റ്റ് ചിന്താഗതിക്കാരനായിരുന്നെന്ന് മുഖ്യ പ്രഭാഷണം നടത്തിയ കെ.മുരളീധരന്‍ എം.എല്‍.എ. പറഞ്ഞു.
ചെമ്പഴന്തി ഗുരുകുലം സെക്രട്ടറി സ്വാമി ശുഭാംഗാനന്ദ സ്വാഗതം പറഞ്ഞു.
അഡ്വ.ടി. ശരത് ചന്ദ്രപ്രസാദ്, കൗണ്‍സിലര്‍മാരായ സി.സുദര്‍ശനന്‍, കെ.എസ്.ഷീല, ഡോ.ഷാജിപ്രഭാകരന്‍, ചെമ്പഴന്തി എസ്.എന്‍.കോളേജ് പ്രിന്‍സിപ്പല്‍ ഡോ.എസ്.ആര്‍.ജിത, ഷൈജു പവിത്രന്‍ പ്രസംഗിച്ചു.