പുല്‍പ്പള്ളി: പുല്‍പ്പള്ളി, മുള്ളന്‍കൊല്ലി പഞ്ചായത്തുകളിലെ വരള്‍ച്ചയെ പ്രതിരോധിക്കുന്നതിനും ജലസംരക്ഷണ പ്രവര്‍ത്തനങ്ങള്‍ക്കുമായി പ്രഖ്യാപിച്ച 80 കോടിരൂപയുടെ പദ്ധതികള്‍ ഉദ്യോഗസ്ഥതലത്തില്‍ നടപ്പിലാക്കാതെ ജനകീയ പങ്കാളിത്തതോടെ നടപ്പിലാക്കണമെന്ന് വിവിധ കര്‍ഷക സംഘടനകള്‍ ആവശ്യപ്പെടുന്നു. ഉദ്യോഗസ്ഥരുടെ തീരുമാനപ്രകാരം പദ്ധതികള്‍ നടപ്പിലാക്കിയാല്‍ കരാറുകാര്‍ക്കും ഉദ്യോഗസ്ഥര്‍ക്കും മാത്രമെ പ്രയോജനമുണ്ടാകുകയുള്ളു. മുന്‍കാലങ്ങളില്‍ പഞ്ചായത്തുകളില്‍ നടപ്പാക്കിയ പദ്ധതികളെ കുറിച്ച് അന്വേഷണം നടത്തണം.
ചില മേഖലകള്‍ കേന്ദ്രീകരിച്ച് പദ്ധതി നടപ്പിലാക്കാനുള്ള നീക്കമാണ് ഉദ്യോഗസ്ഥരുടെ ഭാഗത്ത് നിന്നുണ്ടാകുന്നത്.
ഇത് തടയിടുന്നതിനും ജനപ്രതിനിധികളുടെയും കര്‍ഷകരുടെയും ആഭിപ്രായങ്ങള്‍ ചോദിച്ചറിഞ്ഞ് പദ്ധതി നടപ്പിലാക്കണം. വര്‍ഷാവര്‍ഷം കോടിക്കണക്കിന് രൂപയുടെ ഫണ്ടുകള്‍ ജലസംരക്ഷണത്തിനും മറ്റും ചെലവഴിച്ചെങ്കിലും ആര്‍ക്കും പ്രയോജനമില്ലാത്ത അവസ്ഥയാണ്.
മുന്‍കാലങ്ങളിലേത് പോലെ പദ്ധതികളുടെ ഫണ്ടുകള്‍ അനാവശ്യമായി ചെലവഴിക്കാന്‍ ശ്രമിച്ചാല്‍ അതിനെ തടയിടാനുള്ള തയാറെടുപ്പിലാണ് കര്‍ഷക സംഘടനകള്‍.