അടയ്ക്കാത്തോട്: ഡ്രൈഡേ ദിനത്തില്‍ അനധികൃത മദ്യവില്‍പന നടത്തിയ അടയ്ക്കാത്തോട് സ്വദേശിയായ യുവാവ് പേരാവൂര്‍ എക്‌സൈസിന്റെ പിടിയിലായി. പൊയ്കയില്‍ വീട്ടില്‍ വര്‍ഗീസിന്റെ മകന്‍ വിനീഷ് (36) ആണ് പിടിയിലായത്. അടയ്ക്കാത്തോട് ടൗണ്‍ ഭാഗങ്ങളില്‍ പൊതുജനങ്ങളെയും ഉദ്യോഗസ്ഥരെയും വെല്ലുവിളിച്ച് മദ്യവില്‍പന നടത്തിവന്ന ഇയാളെ ആവശ്യക്കാരെന്ന വ്യാജേന വേഷംമാറി എത്തിയാണ് എക്‌സൈസ് ഉദ്യോഗസ്ഥര്‍ പിടികൂടിയത്. ഇയാളില്‍ നിന്നും 1.250 ലിറ്റര്‍ ഇന്ത്യന്‍ നിര്‍മ്മിത വിദേശമദ്യവും 750 രൂപയും പിടിച്ചെടുത്തു. ഇയാള്‍ വാഹന സഹിതമുള്ള എക്‌സൈസ് കേസുകളില്‍ പ്രതിയാണ്. മാഹിമദ്യം കടത്തിയതുള്‍പ്പെടെയുള്ള നിരവധി കേസുകള്‍ ഇയാള്‍ക്കെതിരെയുണ്ട്. എക്‌സൈസ് ഇന്‍സ്‌പെക്ടര്‍ എ.കെ വിജേഷിന്റെ നേതൃത്വത്തില്‍ പ്രിവന്റീവ് ഓഫീസര്‍ എം.പി സജീവന്‍, സി.പി ഷാജി, ഷൈബി കുര്യന്‍, പി.എസ് ശിവദാസന്‍, കെ. ശ്രീജിത്ത് എന്നിവരുള്‍പ്പെട്ട സംഘമാണ് ഇയാളെ അറസ്റ്റ് ചെയ്തതത്. കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.