മങ്കട: എച്ച്‌വണ്‍, എന്‍വണ്‍ പനി സാധാരണ വൈറല്‍ രോഗമാണെന്നും മങ്കടയില്‍ ഒരാള്‍ മരിക്കാനിടയായ സംഭവത്തില്‍ ആശങ്ക വേണ്ടെന്നും ജില്ലാ മെഡിക്കല്‍ ഓഫിസര്‍ ഡോ. കെ. സക്കീന വാര്‍ത്താ സമ്മേളനത്തില്‍ അറിയിച്ചു. പകര്‍ച്ചവ്യാധികളില്‍ പരിഭ്രാന്തിയല്ല മറിച്ച് ജാഗ്രതയാണ് വേണ്ടത്. ഈ വര്‍ഷം ജില്ലയില്‍ ഇതിനകം 75 പേര്‍ക്ക് എച്ച്‌വണ്‍ എന്‍വണ്‍ റിപ്പോര്‍ട്ട് ചെയ്തിട്ടുണ്ട്. ഇതില്‍ 17 കേസുകള്‍ സ്ഥിരീകരിച്ചു. എച്ച്‌വണ്‍ എന്‍വണ്‍ പൂര്‍ണമായും നിയന്ത്രണവിധേയമാണ്. എല്ലാ ഗവ.ആശുപത്രികളിലും ആവശ്യത്തിന് മരുന്നുകളുണ്ടെന്നും അവര്‍ അറിയിച്ചു.
പനി ബാധിച്ച ആളുമായി സംസാരിച്ചവരോ അവരെ കാണാന്‍ പോയവരോ അയല്‍വാസികളോ പ്രതിരോധ മരുന്ന് കഴിക്കേണ്ട കാര്യമില്ല. രോഗ പ്രതിരോധ ശേഷി കുറഞ്ഞവരില്‍ പകര്‍ച്ച വ്യാധികള്‍ വേഗത്തില്‍ പകരാനിടയുള്ളതിനാല്‍ ഗര്‍ഭിണികളും രണ്ട് വയസിന് താഴെയുള്ള കുട്ടികളും, 65 വയസിന് മുകളിലുള്ളവരും, മറ്റ് ദീര്‍ഘകാല രോഗികളും, മാരക രോഗം ബാധിച്ചവരും പകര്‍ച്ച വ്യാധികളേല്‍ക്കാതിരിക്കാന്‍ ശ്രദ്ധിക്കണം.
കൊതുകിനെ ഉറവിടത്തില്‍ തന്നെ നശിപ്പിക്കാന്‍ വെള്ളിയാഴ്ച സ്‌കൂളുകളിലും ശനിയാഴ്ച കടകളിലും ഓഫിസുകളിലും ഞായറാഴ്ച വീടുകളിലും ഡ്രൈഡേ നിര്‍ബന്ധമായും ആചരിക്കുന്നതിനും ആരോഗ്യ വകുപ്പ് നിര്‍ദേശം നല്‍കിയിട്ടുണ്ടെന്നും ഡി.എം.ഒ അറിയിച്ചു.