മലപ്പുറം: പെട്രോള്‍-ഡീസല്‍ വില വര്‍ധനവും അനുബന്ധ പ്രതിസന്ധികളും രൂക്ഷമായതോടെ ജില്ലയില്‍ സ്വകാര്യ ബസുകളും കട്ടപ്പുറത്തേക്ക്.ബസ് സര്‍വിസുകള്‍ പലതും നിര്‍ത്തിവയ്ക്കുകയാണ്. ഇതിന്റെ മുന്നോടിയായി ബസ് ഉടമകളില്‍ പലരും ആര്‍.ടി.എയില്‍ നിന്നും അനുമതി വാങ്ങുന്നതിനായുള്ള അപേക്ഷകള്‍ കൈപറ്റിയിട്ടുണ്ട്. 30നകം മുഴുവന്‍ ജില്ലകളില്‍ നിന്നുമായി 2000 സ്വകാര്യ ബസുകള്‍ പ്രതിസന്ധി മറികടക്കാനാകാതെ നിര്‍ത്തിവയ്ക്കാനൊരുങ്ങുന്നതായാണ് അറിയുന്നത്. യാത്രക്കാരുടെ എണ്ണക്കുറവിനൊപ്പം ഡീസല്‍, സ്‌പെയര്‍ പാര്‍ട്‌സ് എന്നിവയുടെ വിലകൂടിയതും ഇന്‍ഷുറന്‍സ്, ടാക്‌സ്, എന്നിവയിലുണ്ടായ ചാര്‍ജ് വര്‍ധനവുമാണ് പ്രതിസന്ധി രൂക്ഷമാക്കിയിരിക്കുന്നതെന്നാണ് ബസുടമകള്‍ പറയുന്നത്.
സ്വകാര്യ ബസ് സര്‍വിസുകള്‍ നിര്‍ത്തലാക്കുന്നത് സാധാരണ യാത്രക്കാര്‍ക്കും വിദ്യാര്‍ഥികള്‍ക്കുമായിരിക്കുംഏറ്റവും വലിയ തിരിച്ചടിയാവുക. 97 ശതമാനം വിദ്യാര്‍ഥികളും സാധാരണ യാത്രക്കാരും സ്വകാര്യ ബസുകളെയാണ് നിലവില്‍ ആശ്രയിക്കുന്നത്. ഇത്രയും ബസുകളുടെ റോഡ് നികുതി, വില്‍പ്പന നികുതി തുടങ്ങിയ ഇനത്തില്‍ സംസ്ഥാന സര്‍ക്കാറിനു ലഭിച്ചു കൊണ്ടിരിക്കുന്നതും ഇതു കാരണം നിലക്കും. ഡീസല്‍ വില വര്‍ധനവിന്റെ പേരില്‍ 20 ശതമാനം കെ.എസ്.ആര്‍.ടി.സി ബസുകളും നിലവില്‍ വെട്ടിച്ചുരുക്കിയ സാഹചര്യമാണുള്ളത്. ഇത്തരമൊരു ഘട്ടത്തില്‍ സര്‍വിസ് നടത്തുന്ന സ്വകാര്യ ബസുകളുടെ എണ്ണത്തില്‍ കുറവു വരുന്നത് സാധാരണ ജനങ്ങളെ കൂടുതല്‍ ദുരിതത്തിലാക്കും.
പ്രതിസന്ധി രൂക്ഷമായതോടെ ബസ് ജീവനക്കാരും തൊഴില്‍ നഷ്ടപ്പെടുന്ന ഭീഷണിയിലാണ്. സാമ്പത്തിക പ്രശ്‌നം കണക്കിലെടുത്ത് ചില ബസുകളില്‍ ക്ലീനര്‍മാരെ വെക്കാന്‍പോലും തയാറാകുന്നില്ല.
ജോലിക്കനുസരിച്ചുള്ള വരുമാനം ലഭിക്കാതെ വന്നതോടെ പല ജീവനക്കാരും മറ്റ് തൊഴില്‍ തേടിപ്പോയി തുടങ്ങുകയും ചെയ്തിട്ടുണ്ട്. ചില ബസ് സര്‍വിസുകളില്‍ ക്ലീനറുടെ വേതനം കൂട്ടാന്‍ ഉടമസ്ഥര്‍ തയാറാകാതെ വന്നതോടെ ക്ലീനര്‍ക്കുള്ള വര്‍ധിപ്പിച്ച തുക ബസില്‍ ജോലിചെയ്യുന്ന ഡ്രൈവര്‍, കണ്ടക്ടര്‍, ചെക്കര്‍ എന്നിവര്‍ വീതംവച്ചുനല്‍കുകയാണ്. ഒരു ബസ് സര്‍വിസ് നിലച്ചാല്‍ പത്തോളം പേര്‍ക്ക് പ്രത്യക്ഷമായും പരോക്ഷമായും തൊഴില്‍ നഷ്ടപ്പെടുമെന്നാണ് കണക്കുകള്‍ തെളിയിക്കുന്നത്. സംസ്ഥാന നിരത്തിലൂടെ ഒരുകോടി പത്ത് ലക്ഷം വാഹനങ്ങളാണ് ഓടുന്നത്. ഇതില്‍ 12,000 സ്വകാര്യ ബസുകളാണ്.