കൂത്തുപറമ്പ്: പാട്യം മുതിയങ്ങയില്‍ വീടിനു നേരെ അക്രമം. വീട്ടുമുറ്റത്ത് നിര്‍ത്തിയിട്ട കാറും അടിച്ചു തകര്‍ത്തു. താഴെ മുതിയങ്ങയിലെ മരവന്‍ അബൂബക്കറിന്റെ വീടിനു നേരെയാണ് അക്രമം ഉണ്ടായത്.
വ്യാഴാഴ്ച രാത്രി 12.30 ഓടെയാണ് സംഭവം. വീടിന്റെ മുന്‍ഭാഗത്തെ ജനലിന്റെ ഗ്ലാസുകള്‍ അടിച്ചു തകര്‍ത്ത സംഘം വീട്ടുമുറ്റത്ത് നിര്‍ത്തിയിട്ട അബൂബക്കറിന്റെ മകന്‍ ഷഹീദിന്റെ കാറിന്റെ മുന്‍വശത്തെ ഗ്ലാസ് ഇഷ്ടിക ഉപയോഗിച്ച് തകര്‍ക്കുകയും ടയറുകള്‍ കുത്തിക്കീറുകയും ചെയ്തു. കാര്‍ പൂര്‍ണമായും തകര്‍ത്ത നിലയിലാണ്. ശബ്ദംകേട്ട് വീട്ടുകാര്‍ ഉണര്‍ന്ന് ബഹളം വെച്ചപ്പോള്‍ മൂന്നു ബൈക്കുകളിലായി എത്തിയ അക്രമിസംഘം രക്ഷപ്പെടുകയായിരുന്നുവെന്നും വ്യക്തി വൈരാഗ്യമാകാം അക്രമത്തിനു പിന്നിലെന്ന് കരുതുന്നതായും വീട്ടുകാര്‍ പറഞ്ഞു. കതിരൂര്‍ പൊലിസ് കേസെടുത്ത് അന്വേഷണം തുടങ്ങി.