ലണ്ടന്‍: ഇംഗ്ലിഷ് പ്രീമിയര്‍ ലീഗില്‍ ഇന്നലെ നടന്ന മത്സരങ്ങളില്‍ ലിവര്‍പൂളിനും മാഞ്ചസ്റ്റര്‍ സിറ്റിക്കും ജയം. ആറാം മത്സരത്തിലും ലിവര്‍പൂളിന്റെ അപരാജിത കുതിപ്പായിരുന്നു. സതാംപ്ടണെ എതിരില്ലാത്ത മൂന്ന് ഗോളുകള്‍ക്കാണ് ലിവര്‍പൂള്‍ പരാജയപ്പെടുത്തിയത്. മികച്ച പ്രകടനമാണ് ലിവര്‍പൂള്‍ താരങ്ങള്‍ പുറത്തെടുത്തത്. മാറ്റിപ്പ് (21), മുഹമ്മദ് സലാഹ് (45) എന്നിവര്‍ ലിവര്‍പൂളിനായി ഗോള്‍ നേടി. ഒരു സെല്‍ഫ് ഗോളും പിറന്നു. എതിരില്ലാത്ത അഞ്ചു ഗോളുകള്‍ക്കാണ് മാഞ്ചസ്റ്റര്‍ സിറ്റി കാര്‍ഡിഫ് സിറ്റിയെ തകര്‍ത്തത്. 32-ാം മിനുട്ടില്‍ സെര്‍ജിയോ അഗ്യൂറോയാണ് ഗോള്‍ വേട്ടക്ക് തുടക്കമിട്ടത്. ബര്‍ണാഡോ സില്‍വ (35), ഗുണ്ടോകന്‍ (44), റിയാദ് മെഹ്‌റസ് (67, 89) എന്നിവര്‍ സിറ്റിക്കായി ഗോളുകള്‍ സ്വന്തമാക്കി. എതിരില്ലാത്ത നാലു ഗോളുകള്‍ക്ക് ബേണ്‍ലി എഫ്.സി ബേണ്‍മൗത്തിനെ പരാജയപ്പെടുത്തി. വ്യദ്ര (39), ആരോണ്‍ ലെന്നോന്‍ (41) ആശ്ലി ബാര്‍ണസ് (83,88) എന്നിവര്‍ ബേണ്‍ലിക്കായി സ്‌കോര്‍ ചെയ്തു. ലെയ്‌സസ്റ്റര്‍സിറ്റിയും ഹഡര്‍ഫീല്‍ഡും തമ്മിലുള്ള മത്സരത്തില്‍ 3-1 എന്ന സ്‌കോറിന് ലെയ്‌സസ്റ്റര്‍സിറ്റി ജയം സ്വന്തമാക്കി. ക്രിസ്റ്റല്‍ പാലസും ന്യൂ കാസിലും തമ്മിലുള്ള മത്സരം ഗോള്‍ രഹിത സമനിലയില്‍ അവസാനിച്ചു. മാഞ്ചസ്റ്റര്‍ യുനൈറ്റഡിനെ 1-1 എന്ന സ്‌കോറിന് -വോള്‍വ്‌സ് സമനിലയില്‍ തളച്ചു.