സാവോപോളോ: അടുത്ത മാസം സഊദി അറേബ്യയില്‍ നടക്കുന്ന ബ്രസീല്‍-അര്‍ജന്റീന മത്സരത്തിനുള്ള ബ്രസീല്‍ ടീമിനെ പ്രഖ്യാപിച്ചു. മോശം പെരുമാറ്റത്തെ തുടര്‍ന്ന് വിലക്ക് നേരിടുന്ന താരം ഡഗ്ലസ് കോസ്റ്റയെ ടീമിലുള്‍പ്പെടുത്തിയിട്ടില്ല. തിയാഗോ സില്‍വ, ഫിലിപ്പെ, ഫിലിപ്പ് ലൂയീസ്, ആന്ദ്രേസ് പെരേര, വില്യന്‍ എന്നിവരും ടീമിലുള്‍പ്പെട്ടിട്ടില്ല. എവര്‍ട്ടണ്‍ താരം റിച്ചാല്‍സിലണ്‍ ടീമില്‍ ഇടം നേടിയിട്ടുണ്ട്.
പി.എസ്.ജി താരം നെയ്മര്‍, ബാഴ്‌സ താരം കുട്ടീഞ്ഞോ, ലിവര്‍പൂള്‍ താരം ഫിര്‍മീഞ്ഞോ, അലീസണ്‍, ഫ്രെഡ് എന്നിവരും ടീമിലുണ്ട്. റയല്‍ മാഡ്രിഡ് താരം മാഴ്‌സലോ, ഗബ്രിയേല്‍ ജീസസ്, മിറാന്‍ഡ, ഗോള്‍ കീപ്പര്‍ എഡേഴ്‌സണ്‍, ബാഴ്‌സലോണ താരം മാല്‍കോം എന്നിവരും ടീമില്‍ ഇടം നേടിയിട്ടുണ്ട്. ഒക്ടോബര്‍ 12ന് സഊദി അറേബ്യക്കെതിരേയും ഒക്ടോബര്‍ 16ന് അര്‍ജന്റീനക്കെതിരേയുമാണ് ബ്രസീലിന്റെ മത്സരങ്ങള്‍.
ബ്രസീലിനെ നേരിടേണ്ട അര്‍ജന്റീനിയന്‍ ടീമിന്റെ കാര്യത്തില്‍ അന്തിമ തീരുമാനമായിട്ടില്ല. ഉടന്‍ തന്നെ അര്‍ജന്റീന ടീമിനെ പ്രഖ്യാപിക്കുമെന്നാണ് വിവരം.