സിഡ്‌നി: കൊവിഡിന് ശേഷം ലോകത്ത് അഞ്ചാംപനി പൊട്ടിപ്പുറപ്പെടാന്‍ സാധ്യതയെന്ന് ലോകാരോഗ്യ സംഘടനയുടെ അഞ്ചാംപനി-റുബെല്ല വാക്‌സിനുകളുമായി ബന്ധപ്പെട്ട് പ്രവര്‍ത്തിക്കുന്ന സംഘ തലവനായ ഓസ്‌ട്രേലിയന്‍ ശിശുരോഗ വിദഗ്ധന്‍ കിം മള്‍ഹോളണ്ട്.
കൊവിഡ് വ്യാപനം രൂക്ഷമായതോടെ അഞ്ചാംപനിക്ക് നല്‍കിയിരുന്ന വാക്‌സിന്‍ ഇത്തവണ കാര്യക്ഷമമായി നടന്നിട്ടില്ല. പലരും ആശുപത്രിയില്‍ പോകാന്‍ ഭയപ്പെട്ടു. ഇതു കാരണം നിരവധി കുഞ്ഞുങ്ങളില്‍ പ്രതിരോധ കുത്തിവയ്പ് നടന്നിട്ടില്ലെന്നും റിപ്പോര്‍ട്ടില്‍ പറയുന്നു. പഠന റിപ്പോര്‍ട്ട് മെഡിക്കല്‍ ജേര്‍ണലായ ദി ലാന്‍സെറ്റിലാണ് പ്രസിദ്ധീകരിച്ചത്.
അതിനാല്‍ 2021ന്റെ തുടക്കത്തില്‍ തന്നെ ലോകത്ത് കുട്ടികള്‍ക്കിടയില്‍ അഞ്ചാംപനി രൂക്ഷമാകുമെന്നാണ് റിപ്പോര്‍ട്ടില്‍ പറയുന്നത്. ഇത് തടയാന്‍ രാജ്യാന്തര സഹകരണം ആവശ്യമാണെന്നും റിപ്പോര്‍ട്ട് ചൂണ്ടിക്കാട്ടി.
വരും വര്‍ഷങ്ങളില്‍ അഞ്ചാംപനി പരത്തുന്ന വൈറസുകള്‍ കുട്ടികളില്‍ വ്യാപകമാകും. കൊവിഡിനെപോലെ മൂക്കിലൂടെയാണ് വൈറസ് ശരീരത്തിലേക്ക് പ്രവേശിക്കുക.
ഇതിനെ തടയാന്‍ പ്രതിരോധ കുത്തിവയ്പുകള്‍ എല്ലാ കുഞ്ഞുങ്ങള്‍ക്കും ഉറപ്പുവരുത്തേണ്ടത് ലോകരാജ്യങ്ങള്‍ തന്നെയാണ്. കുത്തിവയ്പ് പ്രചാരണം വൈകിയതിനാല്‍ ഈവര്‍ഷം 36 രാജ്യങ്ങളിലെ 9.4 കോടി കുട്ടികള്‍ക്ക് അഞ്ചാംപനി വാക്‌സിന്‍ ഡോസ് ലഭിച്ചിട്ടില്ലെന്ന് ലോകാരോഗ്യ സംഘടന വ്യക്തമാക്കുന്നു. കൊവിഡ് കാലത്ത് കുട്ടികളിലെ പോഷകാഹാരക്കുറവ് വര്‍ധിച്ചിട്ടുണ്ട്. ഇത് അഞ്ചാംപനി കൂടുതല്‍ രൂക്ഷമാകാന്‍ കാരണമാകുമെന്നും അഞ്ചാംപനി മൂലമുള്ള മരണങ്ങള്‍ വര്‍ധിക്കുമെന്നും റിപ്പോര്‍ട്ടില്‍ ചൂണ്ടിക്കാട്ടുന്നു.