തിരുവനന്തപുരം: സ്‌കോള്‍ കേരള (മുന്‍ ഓപ്പണ്‍ സ്‌കൂള്‍) മുഖേന ഹയര്‍സെക്കന്‍ഡറി ഓപ്പണ്‍ റെഗുലര്‍ കോഴ്‌സില്‍ 2015- 17 ബാച്ചില്‍ പഠനം പൂര്‍ത്തിയാക്കിയ വിദ്യാര്‍ഥികളുടെ കോഷന്‍ ഡെപ്പോസിറ്റ് വിതരണം മെയ് 22ന് ആരംഭിക്കും. കോഴ്‌സ് ഫീസ് പൂര്‍ണമായും അടച്ച, പ്രാക്ടിക്കല്‍ ഉള്ള സബ്ജക്ട് കോമ്പിനേഷനില്‍ പഠനം പൂര്‍ത്തിയാക്കിയവര്‍ മാത്രമാണ് കോഷന്‍ ഡെപ്പോസിറ്റിന് അര്‍ഹരായവര്‍.
അതത് ജില്ലാ കേന്ദ്രങ്ങള്‍ മുഖേനയാണ് തുക വിതരണം. മലപ്പുറം ജില്ലയില്‍ മുന്‍ ജില്ലാ കേന്ദ്രമായിരുന്ന കോട്ടയ്ക്കല്‍ രാജാസ് ഹയര്‍സെക്കന്ററി സ്‌കൂള്‍ മുഖേനയായിരിക്കും വിതരണം. സ്‌കോള്‍ കേരള അനുവദിച്ചിട്ടുളള തിരിച്ചറിയല്‍ കാര്‍ഡുമായി വിദ്യാര്‍ഥികള്‍ നേരിട്ട് കോഷന്‍ ഡെപ്പോസിറ്റ് കൈപ്പറ്റണമെന്ന് എക്‌സിക്യൂട്ടീവ് ഡയറക്ടര്‍ അറിയിച്ചു.