കോഴിക്കോട്: നവംബര്‍ 24 മുതല്‍ ഡിസംബര്‍ 24 വരെ മുസ്‌ലിം യൂത്ത് ലീഗ് നടത്തുന്ന യുവജന യാത്ര വിജയിപ്പിക്കാന്‍ പ്രസിഡന്റ് അഹമ്മദ് കുട്ടി ഉണ്ണികുളത്തിന്റെ അധ്യക്ഷതയില്‍ ചേര്‍ന്ന എസ്.ടി.യു സംസ്ഥാന പ്രവര്‍ത്തക സമിതി യോഗം തീരുമാനിച്ചു. ജനറല്‍ സെക്രട്ടറി അഡ്വ. എം. റഹ്മത്തുള്ള റിപ്പോര്‍ട്ട് അവതരിപ്പിച്ചു. യുവജന യാത്രയുടെ മുന്നോടിയായി എല്ലാ നിയോജക മണ്ഡലങ്ങളിലും ഞങ്ങളുണ്ട് കൂടെ എന്ന മുദ്രാവാക്യവുമായി സൗഹൃദ സദസുകള്‍ സംഘടിപ്പിക്കും.
ഒക്ടോബര്‍ നാലിന് കോഴിക്കോട് ലീഗ് ഹൗസില്‍ നടക്കുന്ന സംസ്ഥാന ജനറല്‍ കൗണ്‍സില്‍ യോഗവും, ചെര്‍ക്കളം അബ്ദുല്ല അനുസ്മരണവും മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി ഉദ്ഘാടനം ചെയ്യും. കെ.എന്‍.എ ഖാദര്‍ എം.എല്‍.എ അനുസ്മരണ പ്രഭാഷണം നടത്തും. മുസ്‌ലിം ലീഗ് സംസ്ഥാന ട്രഷറര്‍ സി.ടി അഹമ്മദ് അലി, വൈസ് പ്രസിഡന്റ് സി. മോയിന്‍കുട്ടി സംസാരിക്കും. തിരുവനന്തപുരം മെഡിക്കല്‍ കോളജില്‍ നിന്ന് അന്യായമായി പിരിച്ചുവിട്ട നഴ്‌സിങ് അസിസ്റ്റന്റുമാരുടെ സമരം ഒത്തുതീര്‍പ്പാക്കണമെന്ന് യോഗം ആവശ്യപ്പെട്ടു.
ഒക്ടോബര്‍ 30നകം എല്ലാ ജില്ലകളിലും നേതൃക്യാംപുകള്‍ നടത്തുവാനും തീരുമാനിച്ചു. കെ.പി മുഹമ്മദ് അഷ്‌റഫ്, എം.എ കരീം, യു. പോക്കര്‍, പി.എം ഹാരിസ്, ഉമ്മര്‍ ഒട്ടുമ്മല്‍, ജി. മാഹിന്‍ അബൂബക്കര്‍, അഡ്വ. വേളാട്ട് അഹമ്മദ്, കല്ലടി അബൂബക്കര്‍, കെ.കെ ഹംസ, അഡ്വ. പി.എം ഹനീഫ, വി.എ.കെ തങ്ങള്‍, അഡ്വ. എസ്.വി ഉസ്മാന്‍ കോയ, പാടം ഇബ്രാഹിംകുട്ടി, അഡ്വ. എം.പി ഗോപി, എസ്. അബൂബക്കര്‍, പി.കെ ഇബ്രാഹിം, സി. മൊയ്തീന്‍ കുട്ടി സംസാരിച്ചു.