ജിദ്ദ: മൂന്ന് പതിറ്റാണ്ട് കാലത്തെ പ്രവാസം നിർത്തി നാട്ടിലേക്ക് മടങ്ങുന്ന കെ.എം.സി.സി നേതാവ് ഹരിദാസിന് ജിദ്ദ കെഎംസിസി സെൻട്രൽ കമ്മിറ്റി യാത്രയപ്പ് നൽകി.1992 ൽ പ്രവാസ ലോകത്തെത്തിയ ഹരിദാസൻ കഴിഞ്ഞ 29 വർഷമായി ഒരേ സ്‌പോൺസറുടെ കീഴിലാണ് ജോലി ചെയ്തു വരുന്നത്. കെ.എം.സി.സി പ്രവർത്തനങ്ങളുമായി സജീമായ ഇദ്ദേഹം കൊറോണക്കാലത്ത് ഷാര  ശാകിരീൻ ഏരിയയിലെ റൂമുകളും ഫ്ലാറ്റുകളും കയറിയിറങ്ങി ജനങ്ങൾക്ക് ഭക്ഷണവും മരുന്നുമെത്തിക്കാൻ വിശ്രമമില്ലാതെ പരിശ്രമിച്ചിരുന്ന സജീവ സാമൂഹ്യ പ്രവർത്തകൻ കൂടിയാണ്.

    1978 മുതൽ സജീവ മുസ്ലിം ലീഗ് പ്രവർത്തകനായ ഇദ്ദേഹം ജിദ്ദ ഷാര ശാകിരീൻ ഏരിയ കെ.എം.സി.സി ട്രഷർ, ആവിലോറ ഗ്ലോബൽ കെ എം.സി.സി പ്രസിഡന്റ്, ജിദ്ദ കൊടുവള്ളി മണ്ഡലം കെ.എം.സി.സി വൈസ് പ്രസിഡന്റ് ,കോഴിക്കോട് ജില്ലാ കമ്മിറ്റി അംഗം തുടങ്ങിയ സ്ഥാനങ്ങൾ വഹിച്ചിട്ടുണ്ട്. ഇന്ത്യൻ യൂണിയൻ മുസ്ലിംലീഗ് പ്രസിഡന്റായിരുന്ന ഇബ്രാഹീം സുലൈമാൻ സേട്ട് സാഹിബിൽ നിന്നാണ് ഹരിദാസൻ പാർട്ടിയുടെ അംഗത്വം സ്വീകരിച്ചത്.

      കൊടുവള്ളി മണ്ഢലത്തിൽ കിഴക്കോത്ത് പഞ്ചായത്തിലെ ആവിലോറ സ്വദേശിയായ ഹരിദാസൻ തന്റെ കുട്ടിക്കാലത്ത് ആവിലോറയിൽ സി.കെ.മുഹമ്മദാജിയുടെ നേതൃത്വത്തിൽ നാടൻ കലയായ കോൽക്കളിയുടെ പരിശീലനവുമുണ്ടായിയിരുന്നു. കോൽക്കളി ടീമിൽ അംഗമായ ഹരിദാസൻ ലീഗിന്റെ പാട്ട് സംഘത്തിന്റെ കൂടെ കൂടി. മുഹമ്മദാജിയുടെ രചനകൾ ചെറിയ പാട്ട് പുസ്തകങ്ങളാക്കി ലീഗ് യോഗങ്ങളിൽ വിൽക്കുന്നതും പതിവാക്കി. അങ്ങിനെ ഹരിദാസൻ പിന്നീട് ലീഗിൽ സജീവമാകുകയായിരുന്നു. ഭാര്യ നിഷാ ഹരിദാസ്, മക്കൾ നിമിഷ ഹരിദാസ്, സൂര്യ ഹരിദാസ്, അഭിനവ് ഹരിദാസ്.  

      ജിദ്ദ സെൻട്രൽ കമ്മിറ്റി നൽകിയ യാത്രയപ്പിൽ അഹമ്മദ് പാളയാട്ട് ഉപഹാരം സമർപ്പിച്ചു . പ്ലസ്‌ടു പരീക്ഷയിൽ 97 ശതമാനം മാർക്ക് വാങ്ങി കൊച്ചിയിൽ ഫുഡ് ടെക്നോളേജിക് പ്രവേശനം ലഭിച്ച ഇദ്ദേഹത്തിന്റെ മകൾ സൂര്യ ഹരിദാസിന്റെ തുടർ പഠനത്തിനുള്ള സഹായമായി കെഎംസിസി ജിദ്ദ സെൻട്രൽ കമ്മിറ്റി സ്പോൺസർ ചെയ്‌ത ഒരു ലക്ഷം രൂപയുടെ ചെക്ക് അദ്ദേഹത്തിന് കൈമാറി. ഭാരവാഹികളായ അബൂബക്കർ അരിമ്പ്ര, വി.പി. മുസ്‌തഫ, റസാക്ക് മാസ്റ്റർ, സി.സി. കരീം, ഇസ്ഹാഖ് പൂണ്ടോളി, നാസർ മച്ചിങ്ങൽ, എ.കെ.ബാവ എന്നിവർ പങ്കെടുത്തു.