പാരിസ്: ഏഷ്യന്‍, ലാറ്റിന്‍ അമേരിക്കന്‍, ആഫ്രിക്കന്‍ പ്രതീക്ഷകള്‍ അസ്തമിച്ച വനിതാലോകകപ്പ് വേദിയില്‍ ഇനി യൂറോപ്യന്‍മാരുടെ അങ്കം. സ്‌പെയിനിനെ തകര്‍ത്ത് ക്വാര്‍ട്ടറില്‍ ആതിഥേയരായ ഫ്രാന്‍സിനെ നേരിടാനൊരുങ്ങുന്ന അമേരിക്ക മാത്രമാണ് യൂറോപ്പിന് പുറത്തുള്ള ഏക ടീം.
നോക്കൗട്ട് റൗണ്ടില്‍ ഏഷ്യന്‍ പ്രതീക്ഷകളായിരുന്ന ആസ്‌ത്രേലിയ, ചൈന, ജപ്പാന്‍ എന്നിവര്‍ യൂറോപ്യന്‍ കരുത്തരായ നോര്‍വേ, ഇറ്റലി, നെതര്‍ലന്‍ഡ്‌സ് എന്നിവര്‍ക്ക് മുന്നില്‍ മുട്ടുമടക്കിയാണ് കളം വിടുന്നത്. എക്‌സ്ട്രാ ടൈമിലേക്ക് നീണ്ട മത്സരത്തില്‍ ആതിഥേയരായ ഫ്രാന്‍സാണ് ലാറ്റിന്‍ അമേരിക്കന്‍ കരുത്തരായ ബ്രസീലിന്റെ ലോകകപ്പ് സ്വപ്നങ്ങള്‍ അവസാനിപ്പിച്ചത്. ഒന്നിനെതിരേ രണ്ടു ഗോളുകള്‍ക്കായിരുന്നു ഫ്രാന്‍സിന്റെ വിജയം.

സ്‌പെയിനിനെ പരാജയപ്പെടുത്തി മുന്‍ചാംപ്യന്മാരായ അമേരിക്കയും ക്വാര്‍ട്ടര്‍ ബെര്‍ത്ത് ഉറപ്പാക്കി. ആഫ്രിക്കന്‍ പ്രതീക്ഷയായിരുന്ന കാമറൂണിനെ എതിരില്ലാത്ത മൂന്നു ഗോളുകള്‍ക്ക് തകര്‍ത്ത് ഇംഗ്ലണ്ടും ക്വാര്‍ട്ടറിലേക്ക് മുന്നേറി. ക്വാര്‍ട്ടറില്‍ മുന്‍ ചാംപ്യന്മാരായ നോര്‍വേയാണ് ഇംഗ്ലണ്ടിന്റെ എതിരാളികള്‍.
നാളെ നടക്കുന്ന മത്സരത്തില്‍ ഇറ്റലി നെതര്‍ലന്‍ഡ്‌സിനേയും ജര്‍മനി സ്വീഡനേയും നേരിടും. ആതിഥേയരായ ഫ്രാന്‍സും നിലവിലെ ചാംപ്യന്‍മാരായ അമേരിക്കയും തമ്മിലുള്ള സൂപ്പര്‍ ക്ലാസിക് ഇന്ന് രാത്രി 12.30ന് നടക്കും.