ശ്രീകണ്ഠപുരം: വീട് കേന്ദ്രീകരിച്ച് സമാന്തര ബാര്‍ നടത്തുകയായിരുന്ന യുവാവിനെ എക്‌സൈസ് സംഘം അറസ്റ്റ് ചെയ്തു. ഏരുവേശി മുയി പ്രയില്‍ കഴകപ്പുര വീട്ടില്‍ സുനീഷിനെയാണ് എക്‌സൈസ് ഇന്‍സ്‌പെക്ടര്‍ പി.പി ജനാര്‍ദ്ദനനും സംഘവും അറസ്റ്റ് ചെയ്തത്. ഏറെക്കാലമായി ഇയാളുടെ വീട് കേന്ദ്രീകരിച്ച് സമാന്തര ബാര്‍ നടത്തുന്നതായി എക്‌സൈസിന് രഹസ്യവിവരം കിട്ടിയതിനെ തുടര്‍ന്ന് ആവശ്യക്കാരെന്ന വ്യാജേന വേഷം മാറി മദ്യം വാങ്ങിയാണ് വലയിലാക്കിയത്. 350 രൂപയുടെ മദ്യം 800 രൂപക്കാണ് വിറ്റത്. ഓടി രക്ഷപ്പെടാന്‍ ശ്രമിച്ച സുനീഷിനെ വളഞ്ഞ് പിടികൂടുകയായിരുന്നു. 12 ലിറ്റര്‍ മദ്യം പിടികൂടി. രാത്രികാലങ്ങളില്‍ സുനീഷിന്റെ വീട്ടില്‍ മദ്യവില്‍പന നടത്താറുണ്ടെന്ന് ഉദ്യോഗസ്ഥര്‍ പറഞ്ഞു.