കാസര്‍കോട്: പാര്‍ക്കിങ് സൗകര്യം ടാക്‌സി കാറുകള്‍ കൈയേറുന്നതിനെ തുടര്‍ന്ന് ഓട്ടോറിക്ഷകള്‍ നടുറോഡില്‍ പാര്‍ക്ക് ചെയ്യേണ്ടി വരുന്നു. നഗരത്തിലെ പഴയ ബസ് സ്റ്റാന്‍ഡ് പരിസരത്തുള്ള ജനറല്‍ ആശുപത്രിയുടെ മുന്നിലുള്ള ഓട്ടോ പാര്‍ക്കിങ് സ്ഥലമാണ് ടാക്‌സി കാറുകള്‍ കൈയേറുന്നത്.
നിലവില്‍ ഓട്ടോ സ്റ്റാന്‍ഡ് സ്ഥിതി ചെയ്യുന്ന ഇവിടെ ആശുപത്രിയില്‍നിന്നും മറ്റുമെത്തുന്ന രോഗികള്‍ ഉള്‍പ്പെടെയുള്ളവര്‍ ഓട്ടോ പിടിച്ചു പോകുന്നതോടെ പാര്‍ക്കിങ് സ്ഥലം ഒഴിവായി കിടക്കുന്ന ചില സമയങ്ങള്‍ ഉണ്ടാകാറുണ്ട്. ഈ തക്കം നോക്കിയാണ് ടാക്‌സി കാറുകള്‍ ഓട്ടോസ്റ്റാന്‍ഡിന്റെ സ്ഥലം കൈയേറുന്നത്. ഇതേതുടര്‍ന്ന് ഓട്ടം പോയ ഓട്ടോകള്‍ തിരികെ സ്റ്റാന്‍ഡിലെത്തുമ്പോള്‍ പാര്‍ക്ക് ചെയ്യാന്‍ സ്ഥലമില്ലാതെ നടുറോഡില്‍ നിര്‍ത്തിയിടേണ്ട അവസ്ഥയാണ് നിലവിലുള്ളത്.
ജനറല്‍ ആശുപത്രിക്കു പുറമെ ഹെഡ് പോസ്റ്റ് ഓഫിസ് ഉള്‍പ്പെടെയുള്ള വിവിധ സ്ഥാപനങ്ങളും മറ്റും ഈഭാഗത്തു സ്ഥിതി ചെയ്യുന്നതിനു പുറമെ ഏറെ തിരക്കനുഭവപ്പെടുന്ന സ്ഥലം കൂടിയാണ് പഴയ ബസ് സ്റ്റാന്‍ഡ് പരിസരം.
ഓട്ടോറിക്ഷകള്‍ നടുറോഡില്‍ പാര്‍ക്ക് ചെയ്യുന്നതിനെ തുടര്‍ന്ന് ഇതുവഴി സഞ്ചരിക്കുന്ന കാല്‍നട യാത്രക്കാരും വാഹനങ്ങളും കടുത്ത പ്രയാസമാണ് അനുഭവിക്കുന്നത്. നഗരസഭാ ആസ്ഥാനത്തിന്റെ മൂക്കിനുതാഴെയാണ് ഓട്ടോസ്റ്റാന്‍ഡില്‍ ടാക്‌സി കാറുകള്‍ അനധികൃതമായി പാര്‍ക്ക് ചെയ്യുന്നതെന്ന് സ്റ്റാന്‍ഡിലെ ഓട്ടോഡ്രൈവര്‍മാര്‍ പറഞ്ഞു.