താമരശേരി: ശക്തമായ വേനല്‍ മഴയോടൊപ്പം ഇന്നലെ വൈകുന്നേരം അഞ്ചരയോടെ ആഞ്ഞടിച്ച ശക്തമായ കാറ്റില്‍ വ്യാപക നാശം. തെങ്ങ് മുറിഞ്ഞ് വീണ് രണ്ടണ്ട് വീടുകള്‍ തകര്‍ന്നു. ചെമ്പ്രകുണ്ട പെരുമയില്‍ ഫാത്തിമയുടെ ഓട് മേഞ്ഞ വീട് പൂര്‍ണ്ണമായും, ചെമ്പ്രകുണ്ട മുഹമ്മദ് വയനിപ്പൊയിലിന്റെ കോണ്‍ക്രീറ്റ് വീട് ഭാഗികമായും തകര്‍ന്നു. മരങ്ങള്‍ ഒടിഞ്ഞും കടപുഴകി വീണും ഇലക്ടിക് പോസ്റ്റുകള്‍ തകര്‍ന്ന് വൈദ്യതി വിതരണം താറുമാറായി.
ഗതാഗതവും തടസ്സപ്പെട്ടു. തെങ്ങ്, കമുക്, വാഴ, കപ്പ, തുടങ്ങിയ വിളകളും നശിച്ചു. മൂത്തോറ്റിക്കല്‍, അമരാട്, കട്ടിപ്പാറ അങ്ങാടി, ചെമ്പ്രകുണ്ട, ത്രിവേണി, താഴ്‌വാരം എന്നിവിടങ്ങളിലാണ് ചുഴലിക്കാറ്റ് താണ്ഡവമാടിയത്. ഏതാനും മിനിറ്റുകള്‍ മാത്രം വീശിയ കാറ്റ് കട്ടിപ്പാറയില്‍ വന്‍ നാശമുണ്ടാക്കി.