കൊച്ചി: തിരുവനന്തപുരം വിമാനത്താവളം വഴിയുള്ള സ്വര്‍ണക്കടത്ത് കേസില്‍ കസ്റ്റംസ് ഉദ്യോഗസ്ഥര്‍ക്ക് ഹൈക്കോടതിയുടെ രൂക്ഷ വിമര്‍ശനം.
83 തവണ പ്രതികള്‍ വിമാനത്താവളം വഴി സ്വര്‍ണം കടത്തുമ്പോള്‍ ഉദ്യോഗസ്ഥരെന്തെടുക്കുകയായിരുന്നുവെന്നും
കസ്റ്റംസ് ഉദ്യോഗസ്ഥര്‍ നിഷ്‌ക്രിയര്‍ ആണോ എന്നും കോടതി ചോദിച്ചു.
കേസിലെ നാല് പ്രതികളുടെ ജാമ്യഹരജി പരിഗണിക്കവേയായിരുന്നു കോടതിയുടെ പരാമര്‍ശം.

കസ്റ്റംസ് സൂപ്രണ്ടിന്റെ പങ്ക് കേസില്‍ അന്വേഷിക്കണം. 83 തവണ പ്രതികള്‍ വിമാനത്താവളം വഴി സ്വര്‍ണം കടത്തിയത് വേദനാജനകമാണെന്നും കോടതി അഭിപ്രായപ്പെട്ടു. ഇവരുടെ അറിവോ സമ്മതമോ ഇല്ലാതെ ഇതൊന്നും നടക്കില്ലെന്നതിന്റെ സൂചനകൂടിയാണ് കോടതി നല്‍കിയത്.

മെയ് 13നാണ് ദുബായില്‍ നിന്ന് കടത്തിക്കൊണ്ടുവന്ന 25 കിലോഗ്രാം സ്വര്‍ണം തിരുവനന്തപുരം വിമാനത്താവളത്തില്‍ നിന്ന് പിടികൂടിയത്. കേസിലെ മുഖ്യപ്രതി അഡ്വ.ബിജു മനോഹര്‍ പിന്നീട് ഡി.ആര്‍.ഐ ഓഫിസിലെത്തി കീഴടങ്ങിയിരുന്നു.
കേസില്‍ കസ്റ്റംസ് സൂപ്രണ്ട് വി.രാധാകൃഷ്ണനും പ്രതിയാക്കിയിട്ടുണ്ട്.