ലണ്ടന്‍: ടോസ് നഷ്ടപ്പെട്ട് ബാറ്റിങ്ങിനിറങ്ങേണ്ടി വന്ന ശ്രീലങ്കക്ക് നേടാനായത് 203 റണ്‍സ് മാത്രം. 49.3 ഓവറില്‍ ശ്രീലങ്കന്‍ ബാറ്റിങ് നിരയെ പൂര്‍ണമായും പുറത്താക്കിയാണ് ദക്ഷിണാഫ്രിക്ക താരതമ്യേന കുറഞ്ഞ സ്‌കോറില്‍ ലങ്കയെ കെട്ടിയിട്ടത്. ലങ്കന്‍ ബാറ്റിങ് നിരയില്‍ ഓരാള്‍ക്ക് പോലും അര്‍ധസെഞ്ച്വറി നേടാന്‍ സാധിച്ചില്ല. 30 റണ്‍സ് വീതമെടുത്ത കുശാല്‍ പെരേര, ആവിഷ്‌ക ഫെര്‍ണാണ്ടോ എന്നിവരാണ് ടോപ് സ്‌കോറര്‍മാര്‍. മത്സരത്തിലെ ആദ്യ പന്തില്‍ തന്നെ ക്യാപ്റ്റനും ഓപണറുമായ ദിമുത് കരുണരത്‌നയെ ലങ്കക്ക് നഷ്ടമായി. പിന്നീടെല്ലാം ഒരു ചടങ്ങായിരുന്നു. 10 ഓവറില്‍ 25 റണ്‍സ് മാത്രം വഴങ്ങി മൂന്ന് വിക്കറ്റ് പിഴുത ഡ്വേയിന്‍ പ്രിട്ടോറിയസ് ആണ് ദക്ഷിണാഫ്രിക്കന്‍ ബൗളിങ് നിരയില്‍ മികച്ച പ്രകടനം കാഴ്ചവെച്ചത്. മറുപടി ബാറ്റിങ്ങിനിറങ്ങിയ ദക്ഷിണാഫ്രിക്ക അഞ്ച് ഒവറില്‍ ഒരു വിക്കറ്റ് നഷ്ടത്തില്‍ 32 റണ്‍സ് എന്ന നിലയിലാണ്.