എരുമേലി: രാജീവ്ഗാന്ധിയുടെ  26-ാമത് രക്തസാക്ഷിത്വദിനമായ ഞായറാഴ്ച ഐ.എന്‍.ടി.യു.സി എരുമേലി മണ്ഡലം കമ്മിറ്റി വിവിധ പരിപാടികളോടെ ആചരിക്കുന്നു. രാവിലെ 8.30ന് ഇരുമ്പൂന്നിക്കരയിലും, ഒന്‍പതിന് എരുമേലി പ്രൈവറ്റ് ബസ്സ്റ്റാന്‍ഡ് ജംഗ്ഷനിലും രാജീവ്ഗാന്ധിയുടെ ഛായാചിത്രത്തില്‍ പുഷ്പാര്‍ച്ചന നടത്തും. വൈകിട്ട് നാലിന് തുമരംപാറയില്‍ നിന്നും ആരംഭിക്കുന്ന ഛായാചിത്ര പദയാത്ര കോണ്‍ഗ്രസ് മണ്ഡലം സെക്രട്ടറി ജോസ് ഇളയാനിത്തോട്ടം ഫ്‌ളാഗ് ഓഫ് ചെയ്യും.
തുടര്‍ന്ന് ഇരുമ്പൂന്നിക്കര സെബാസ്റ്റ്യന്‍ കുത്തുകല്ലുങ്കല്‍ നഗറില്‍ ചേരുന്ന അനുസ്മരണ സമ്മേളനം ഐ.എന്‍.ടി.യു.സി മണ്ഡലം പ്രസിഡന്റ് പി.കെ വിശ്വംഭരന്റെ അധ്യക്ഷതയില്‍ സംസ്ഥാന ജനറല്‍ സെക്രട്ടറി മലയാലപ്പുഴ ജ്യോതിഷ്‌കുമാര്‍ ഉദ്ഘാടനം ചെയ്യും. ഡി.സി.സി ജനറല്‍ സെക്രട്ടറി പ്രകാശ് പുളിക്കന്‍, പൂഞ്ഞാര്‍ റീജണല്‍ പ്രസിഡന്റ് നാസര്‍ പനച്ചി എന്നിവര്‍ സംസാരിക്കും. ജില്ലാ വൈസ് പ്രസിഡന്റുമാര്‍, കോണ്‍ഗ്രസ് മുന്‍ ബ്ലോക്ക് പ്രസിഡന്റ്മാര്‍ തുടങ്ങിയവരും പങ്കെടുക്കും.