ചെറുവത്തൂര്‍ (കാസര്‍കോട്): രാവിലെ വരണാധികാരിക്ക് മുമ്പാകെ നാമനിര്‍ദേശ പത്രിക സമര്‍പ്പിച്ച ഇര്‍ഷാദ് പിന്നെ കല്യാണപയ്യനായി. ചെറുവത്തൂര്‍ പഞ്ചായത്തിലെ പതിനൊന്നാം വാര്‍ഡ് വെങ്ങാട്ട് നിന്നും യു.ഡി.എഫ് സ്ഥാനാര്‍ഥിയായി മത്സരിക്കുന്ന എ.സി ഇര്‍ഷാദാണ് പത്രിക സമര്‍പണം കഴിഞ്ഞു കല്യാണ പന്തലിലെത്തിയത്.
എല്‍.ഡി.എഫിന്റെ സിറ്റിങ് സീറ്റായ വെങ്ങാട്ട് വാര്‍ഡില്‍ ജീവകാരുണ്യ പ്രവര്‍ത്തകന്‍ കൂടിയായ സ്ഥാനാര്‍ഥിയെ ഇറക്കി വാര്‍ഡ് പിടിച്ചെടുക്കാനാവുമെന്ന ഉറച്ച പ്രതീക്ഷയിലാണ് യു.ഡി.എഫ് കേന്ദ്രങ്ങള്‍. പത്രിക സമര്‍പണത്തിന്റെ അവസാന ദിനമായ ഇന്നലെ രാവിലെ കല്യാണപ്പന്തലില്‍ നിന്നും അല്‍പം സമയം കണ്ടെത്തിയാണ് ഇര്‍ഷാദ് വരണാധികാരിക്ക് മുന്നിലെത്തിയത്. വലിയപറമ്പ മാവിലാകടപ്പുറത്തെ മുബീനയാണ് ഇര്‍ഷാദിന്റെ വധു. നവവരന്റെ സ്ഥാനാര്‍ഥിത്വത്തില്‍ മുബീനയും കുടുംബക്കാരും ആഹ്ലാദത്തിലാണ്.