കൊച്ചി: നഗരത്തിന്റെ ചലനം മുഴുവന്‍ ഇനി കാമറ കണ്ണുകള്‍ ഒപ്പിയെടുക്കും. വര്‍ധിച്ചുവരുന്ന കുറ്റകൃത്യങ്ങശും അപകടങ്ങളു തടയുന്നതിന്റെ ഭാഗമായാണ് നഗരത്തില്‍ കാമറ കണ്ണുകള്‍ മിഴിതുറക്കുന്നത്. ഇതിന്റെ ആദ്യ പടിയായി കൊച്ചി നഗരപരിധിയില്‍ വരുന്ന സ്ഥലങ്ങളില്‍ 400 കാമറകള്‍ സ്ഥാപിക്കാന്‍ തീരുമാനം. ഹൈ റെസല്യൂഷനും നൈറ്റ് വിഷനും സൂമിങ് സാധ്യമാക്കുന്നതുമായ പുതുതലമുറയിലെ അത്യന്ത്യാധുനിക കാമറകളാണ് സ്ഥാപിക്കുക. കാമറകള്‍ സ്ഥാപിക്കുന്നതോടെ ഗതാഗതക്കുരുക്കിനും ഒരു പരിധിവരെ പരിഹാരമുണ്ടാകുമെന്നാണ് അധികൃതരുടെ കണക്കുകൂട്ടല്‍.  
പ്രധാനസ്ഥലങ്ങളില്‍ നിരീക്ഷണകാമറ സ്ഥാപിക്കുന്നതുമായി ബന്ധപ്പെട്ട് ഇന്നലെ ഐ.എം.എ ഹാളില്‍ നടന്ന യോഗത്തിലാണ് തീരുമാനം. ജില്ലയിലെ എം.എല്‍.എമാരുടെയും കെ.വി തോമസ് എം.പിയുടെയും സാന്നിദ്ധ്യത്തില്‍ കൊച്ചി റേഞ്ച് പൊലിസ് ഇന്‍സ്‌പെക്ടര്‍ ജനറല്‍ പി വിജയന്റെ നേതൃത്വത്തിലായിരുന്നു യോഗം. കെല്‍ട്രോണിന്റെ നേതൃത്വത്തില്‍ നടന്ന പഠനത്തിന്റെ അടിസ്ഥാനത്തില്‍ പദ്ധതിയുടെ  ആദ്യഘട്ടത്തില്‍ 400 കാമറകള്‍ സ്ഥാപിക്കാന്‍ തീരുമാനിക്കുകയായിരുന്നു.  ടെണ്ടര്‍ നടപടികളും ഫണ്ട് വിനിയോഗവും  നടത്തുന്നതിനായി ജില്ലാ കലക്ടറുടെ നേതൃത്വത്തില്‍ ഒരു കമ്മിറ്റി രൂപീകരിക്കും.
പദ്ധതി പൂര്‍ത്തിയാക്കാന്‍  ആസ്തി വികസനഫണ്ടില്‍ നിന്ന് തുക നല്‍കാമെന്ന് എം.എല്‍.എമാര്‍ പറഞ്ഞു. പദ്ധതിയ്ക്ക് എല്ലാ സഹായസഹകരണങ്ങളും കെ.വി തോമസ് എം.പിയും ഉറപ്പുനല്‍കി. യോഗത്തില്‍ കെ.വി തോമസ് എം.പി, എം.എല്‍.എമാരായ കെ.ജെ മാക്‌സി, ഹൈബി ഈഡന്‍, ജോണ്‍ ഫെര്‍ണാണ്ടസ്, എസ് ശര്‍മ  എന്നിവരും ജില്ലാ കലക്ടര്‍ കെ മുഹമ്മദ് വൈ സഫീറുള്ളയും പങ്കെടുത്തു. തദ്ദേശസ്വയംഭരണസ്ഥാപനങ്ങളിലെയും പൊതുമേഖലാ സ്വകാര്യസ്ഥാപനങ്ങളിലെയും ഉദ്യോഗസ്ഥരും യോഗത്തില്‍ പങ്കെടുത്തു.