തിരൂര്‍: പ്രമുഖ പണ്ഡിതനും സമസ്ത കേരള ജംഇയ്യത്തുല്‍ ഉലമാ മുശാവറ അംഗവുമായ എ. മരക്കാര്‍ ഫൈസി നിറമരുതൂര്‍ (74) അന്തരിച്ചു. വാര്‍ധക്യസഹജമായ അസുഖത്തെ തുടര്‍ന്ന് തിങ്കളാഴ്ച കോട്ടക്കലിലെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. ഇന്നലെ ഉച്ചയ്ക്ക് 12ഓടെയാണ് അന്തരിച്ചത്.
സമസ്ത ഫത്‌വാ കമ്മിറ്റി അംഗം, സമസ്ത തിരൂര്‍ താലൂക്ക് പ്രസിഡന്റ്, താനൂര്‍ ഇസ്‌ലാഹുല്‍ ഉലൂം അറബിക് കോളജ് വൈസ് പ്രസിഡന്റ്, വളവന്നൂര്‍ ബാഫഖി യതീംഖാന കമ്മിറ്റി അംഗം, ചെമ്മാട് ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി കമ്മിറ്റി അംഗം തുടങ്ങിയ പദവികള്‍ വഹിച്ചുവരികയായിരുന്നു. സമസ്ത കേന്ദ്ര മുശാവറ അംഗമായിരുന്ന നിറമരുതൂര്‍ എ. ബീരാന്‍കുട്ടി മുസ്‌ലിയാര്‍-ഉമ്മാത്തുമ്മ ദമ്പതികളുടെ പുത്രനായി 1946ലാണ് ജനനം.
പിതാവില്‍നിന്ന് നീണ്ടകാലം ദര്‍സ് പഠനം നടത്തി. തുടര്‍ന്ന് പട്ടിക്കാട് ജാമിഅ നൂരിയ്യയില്‍ ഉപരിപഠനം നടത്തുകയും 1971ല്‍ ഒന്നാം റാങ്കോടെ ഫൈസി ബിരുദം കരസ്ഥമാക്കുകയും ചെയ്തു. കണ്ണിയത്ത് അഹ്മദ് മുസ്‌ലിയാര്‍, ശംസുല്‍ ഉലമ ഇ.കെ അബൂബക്കര്‍ മുസ്‌ലിയാര്‍, കോട്ടുമല അബൂബക്കര്‍ മുസ്‌ലിയാര്‍ തുടങ്ങിയവര്‍ പ്രധാന ഗുരുക്കന്മാരാണ്. കരിങ്ങനാട്, കോട്ടക്കല്‍ പാലപ്പുറം, ചെമ്മന്‍കടവ്, വള്ളിക്കാഞ്ഞിരം, കൈനിക്കര, കാരത്തൂര്‍ ബദ്‌രിയ്യ കോളജ്, പൊന്മുണ്ടം, അയ്യായ, വാണിയന്നൂര്‍ എന്നിവിടങ്ങളില്‍ ദര്‍സ് നടത്തി. അഞ്ചു വര്‍ഷത്തോളമായി താനൂര്‍ ഇസ്‌ലാഹുല്‍ ഉലൂം അറബിക് കോളജിലെ മുദരിസായി സേവനം ചെയ്തുവരികയായിരുന്നു.
ഭാര്യ: ഫാത്വിമ. മക്കള്‍: അബ്ദുറഹിമാന്‍, ശരീഫ്, റാബിയ, റൈഹാനത്ത്, ഉമ്മുഹബീബ, ഹന്നത്ത്, പരേതനായ അബ്ദുല്‍ ഹക്കീം. മരുമക്കള്‍: ബഷീര്‍ മുത്തൂര്‍, റശീദ് ചെമ്പ്ര, കെ.പി.എ റസാഖ് ഫൈസി ആലിങ്ങല്‍, അബ്ദുല്‍ സലീം തലക്കട്ടൂര്‍, സുഹ്‌റ പത്തമ്പാട്, രഹ്‌ന വെട്ടിച്ചിറ. സഹോദരങ്ങള്‍: മുഹമ്മദ് കുട്ടി മുസ്‌ലിയാര്‍, ഹൈദര്‍ ഹാജി, ആഇശുമ്മ, ഫാത്വിമ, പരേതരായ അബ്ദുല്ല മുസ്‌ലിയാര്‍, ഫാത്വിമക്കുട്ടി. ജനാസ ഇന്നലെ വൈകിട്ട് പത്തമ്പാട് ജുമാമസ്ജിദില്‍ ഖബടക്കി.