ലണ്ടന്‍: ഈ വര്‍ഷത്തെ മാന്‍ ബുക്കര്‍ പുരസ്‌കാരം സ്‌കോട്ടിഷ് അമേരിക്കന്‍ എഴുത്തുകാരന്‍ ഡഗ്ലസ് സ്റ്റുവര്‍ട്ടിന്. ഡഗ്ലസ് സ്റ്റുവര്‍ട്ടിന്റെ ഷഗ്ഗി ബെയിന്‍ എന്ന നോവലിനാണ് പുരസ്‌കാരം. കൊവിഡിന്റെ പശ്ചാത്തലത്തില്‍ ഓണ്‍ലൈനായാണ് പുരസ്‌കാരം പ്രഖ്യാപിച്ചത്. 52ാമത് മാന്‍ബുക്കര്‍ പ്രൈസാണിത്. നൊബേല്‍ സമ്മാനത്തിന് ശേഷം ഒരു സാഹിത്യകൃതിക്ക് ലഭിക്കുന്ന ഏറ്റവും വലിയ പുരസ്‌കാരമാണ് മാന്‍ ബുക്കര്‍ പ്രൈസ്.

1980കളിലെ ഗ്ലാസ്‌ഗോയിലെ തൊഴിലാളികളുടെ ജീവിതത്തെ ആസ്പദമാക്കിയുള്ള നോവലാണ് ഷഗ്ഗി ബെയിന്‍. ഡഗ്ലസ് സ്റ്റുവര്‍ട്ടിന്റെ ആദ്യ നോവലാണിത്. ആറ് രചനകളാണ് ഇത്തവണ പുരസ്‌കാരത്തിന് പരിഗണിച്ചത്.

പത്തുവര്‍ഷത്തോളമെടുത്താണ് ഇദ്ദേഹം ഈ നോവലെഴുതിയത്. 80 കളില്‍ ജീവിച്ച ഒരാണ്‍കുട്ടിയുടെ കഥയാണ് നോവല്‍ പറയുന്നത്. പുരസ്‌കാരം മരണപ്പെട്ട തന്റെ അമ്മയ്ക്ക് സമര്‍പ്പിക്കുന്നെന്ന് ഡഗ്ലസ് പ്രതികരിച്ചു. ന്യൂയോര്‍ക്കിലാണ് ഡഗ്ലസ് താമസിക്കുന്നത്.