കൊച്ചി: പാലാരിവട്ടം പാലം അഴിമതിക്കേസില്‍ അറസ്റ്റിലായി ആശുപത്രിയില്‍ റിമാന്‍ഡില്‍ കഴിയുന്ന മുന്‍മന്ത്രി വി.കെ ഇബ്‌റാഹീംകുഞ്ഞിന്റെ ജാമ്യാപേക്ഷ മൂവാറ്റുപുഴ വിജിലന്‍സ് കോടതി 24ന് പരിഗണിക്കും. അന്നുതന്നെ അന്വേഷണസംഘത്തിന്റെ കസ്റ്റഡി അപേക്ഷയും കോടതി പരിഗണിക്കും.
പാലം നിര്‍മാണത്തില്‍ ഇബ്‌റാഹീംകുഞ്ഞ് ക്രമവിരുദ്ധ ഇടപെടല്‍ നടത്തിയെന്ന വിജിലന്‍സിന്റെ ആരോപണം അദ്ദേഹത്തിന്റെ അഭിഭാഷകന്‍ നിഷേധിക്കുകയും രേഖകള്‍ ഹാജരാക്കാന്‍ കൂടുതല്‍ സമയം വേണമെന്ന് ആവശ്യപ്പെടുകയുമായിരുന്നു. ഇതേതുടര്‍ന്നാണ് ജാമ്യാപേക്ഷയും കസ്റ്റഡി അപേക്ഷയും പരിഗണിക്കുന്നത് 24ലേക്ക് മാറ്റിയത്.
പാലം നിര്‍മാണത്തിന് അനുമതി നല്‍കിയതുകൊണ്ടു മാത്രമാണ് പ്രതിചേര്‍ത്തതെന്ന് ഇബ്‌റാഹീംകുഞ്ഞിന്റെ അഭിഭാഷകന്‍ കെ. രാമന്‍പിള്ള വാദിച്ചു. കൈക്കൂലി വാങ്ങിയിട്ടില്ലെന്നും മൊബിലൈസേഷന്‍ ഫണ്ട് അനുവദിച്ചതില്‍ ക്രമക്കേടില്ലെന്നും ഇതിന് കാബിനറ്റിന്റെ അനുമതി വേണ്ടെന്നും അദ്ദേഹം വിശദീകരിച്ചു.
അതേസമയം ഇബ്‌റാഹീംകുഞ്ഞിന്റെ ആരോഗ്യനില അറസ്റ്റിലായ ദിവസത്തേതുപോലെ തുടരുന്നതായി ആശുപത്രി അധികൃതര്‍ അറിയിച്ചു.