മുംബൈ: മുംബൈയില്‍ ജയ് ശ്രീറാം വിളിക്കാന്‍ ആവശ്യപ്പെട്ട് ടാക്‌സി ഡ്രൈവര്‍ക്ക് ക്രൂര മര്‍ദനം. താനെയിലെ ദിവാ ഏരിയയില്‍ 25 കാരനായ ഫൈസല്‍ ഉസ്മാന്‍ ഖാന്‍ എന്നയാള്‍ക്കാണ് മര്‍ദനമേറ്റത്.
കഴിഞ്ഞ ദിവസം പുലര്‍ച്ചെ മൂന്നോടെ താനെയില്‍നിന്ന് മുംബൈയിലേക്കുള്ള യാത്രക്കിടെയായിരുന്നു സംഭവം. സംഭവത്തെകുറിച്ച് ഫൈസല്‍ പറയുന്നത് ഇങ്ങനെ: മാനവ് കല്യാണ്‍ ആശുപത്രിയില്‍നിന്ന് മൂന്നുപേരെ കാറില്‍ കയറ്റി കൊണ്ടുപോകുകയായിരുന്നു. കാര്‍ പെട്ടെന്ന് ബ്രേക്ക് ഡൗണ്‍ ആയി.
പാര്‍ക്കിങ് ലൈറ്റ് ഇട്ട ശേഷം റോഡരികില്‍ നിര്‍ത്തി തകരാര്‍ പരിശോധിക്കുകയായിരുന്നു. കാര്‍ വീണ്ടും സ്റ്റാര്‍ട്ട് ചെയ്യാന്‍ ശ്രമിച്ചപ്പോഴാണ് ബൈക്കിലെത്തിയ മൂന്നംഗ സംഘം അക്രമിച്ചത്. എന്തിനാണ് വണ്ടി നടുറോട്ടില്‍ നിര്‍ത്തിയതെന്ന് ചോദിച്ച് തട്ടിക്കയറുകയായിരുന്നു.

കാറിന്റെ താക്കോല്‍ ഊരിയെടുക്കുകയും വണ്ടിയില്‍നിന്ന് പുറത്തിറക്കി മര്‍ദിക്കുകയും ചെയ്തു. കാറിലുണ്ടായിരുന്ന യാത്രക്കാര്‍ ഇടപെടാന്‍ തുടങ്ങിയെങ്കിലും അവരെയും ഭീഷണിപ്പെടുത്തി. മുസ്‌ലിമാണെന്ന് തിരിച്ചറിഞ്ഞതോടെ 'ജയ് ശ്രീറാം' എന്ന് വിളിക്കണമെന്നാവശ്യപ്പെട്ടു.
മര്‍ദനത്തില്‍ വേദന തോന്നിയപ്പോള്‍ യാ അല്ലാഹ് എന്ന് നിലവിളിച്ചതോടെ, ജയ് ശ്രീറാം വിളിക്കൂവെന്നു പറഞ്ഞ് മര്‍ദനം ശക്തമാക്കുകയായിരുന്നു. ജയ് ശ്രീറാം പറഞ്ഞാലേ പോകാന്‍ അനുവദിക്കൂവെന്നും അക്രമികള്‍ ശഠിച്ചു.

ഈ സമയം പൊലിസിനെ വിളിക്കാന്‍ ശ്രമിച്ച ടാക്‌സി യാത്രക്കാരില്‍ ഒരാളുടെ ഫോണ്‍ അക്രമികള്‍ പിടിച്ചുവാങ്ങി എറിഞ്ഞ് പൊട്ടിച്ചു. എന്റെ ഫോണും അവര്‍ കൊണ്ടുപോയെന്നും ഫൈസല്‍ പറഞ്ഞു. അക്രമികള്‍ പോയ ശേഷമാണ് ഫൈസല്‍ സ്റ്റേഷനിലെത്തി പരാതി നല്‍കിയത്.
മര്‍ദനമേറ്റതായും ഫോണ്‍ കളവുപോയതായും മാത്രമാണ് ഫൈസല്‍ തിങ്കളാഴ്ച പൊലിസിന് നല്‍കിയ പരാതിയില്‍ പറഞ്ഞിരുന്നത്. അക്രമികളെ കുറിച്ചുള്ള ഭീതിയായിരുന്നു എല്ലാ കാര്യങ്ങളും തുറന്നുപറയാന്‍ മടിച്ചത്. പിന്നീട് മുതിര്‍ന്ന പൊലിസ് ഓഫിസര്‍മാരുടെ ചോദ്യം ചെയ്യലിലാണ് എല്ലാ കാര്യങ്ങളും തുറന്നു പറഞ്ഞതെന്നും ഫൈസല്‍ കൂട്ടിച്ചേര്‍ത്തു.

സംഭവത്തില്‍ മൂന്നുപേര്‍ അറസ്റ്റിലായി. പിടിയിലായവരുടെ പേരുവിവരങ്ങള്‍ പുറത്തുവിട്ടിട്ടില്ല. അക്രമികള്‍ക്കെതിരേ മതവികാരം വ്രണപ്പെടുത്തല്‍, പിടിച്ചുപറി തുടങ്ങിയ വകുപ്പുകള്‍ പ്രകാരമാണ് കേസെടുത്തത്.