തളിപ്പറമ്പ്: കരിമ്പം ഫാമില്‍  അമ്പതിനായിരത്തോളം ടിഷ്യുകള്‍ച്ചര്‍ വാഴത്തൈകള്‍ വിതരണനത്തിന് തയാറായി.
ഒരു മാസം ഒരു ലക്ഷം എന്ന രീതിയില്‍ വര്‍ഷത്തില്‍ പന്ത്രണ്ടു ലക്ഷം തൈകള്‍ ഉല്‍പ്പാദിപ്പിക്കാനുള്ള എല്ലാ ഒരുക്കങ്ങളും പൂര്‍ത്തിയായി വരികയാണ്. കരിമ്പം ഫാമിലെ കാരത്തും പാറയില്‍ പ്രവര്‍ത്തിക്കുന്ന സംസ്ഥാനത്തെ രണ്ടാമത്തെ ടിഷ്യു കള്‍ച്ചര്‍ ലാബില്‍ നിന്നും  കഴിഞ്ഞ ഒരു വര്‍ഷത്തെ ശ്രമഫലമായിട്ടാണ് ഇത്രയും വാഴത്തൈകള്‍ ആദ്യമായി പുറത്തിറക്കുന്നത്.
പ്രവര്‍ത്തനം തുടങ്ങിയിട്ട് മൂന്ന് വര്‍ഷമായെങ്കിലുംആദ്യമായാണ് ഇത്രയേറെ തൈകള്‍ കണ്ണൂര്‍ ലാബില്‍ ഉല്‍പ്പാദിപ്പിച്ചിരിക്കുന്നത്. തുടക്കത്തില്‍ ഗ്രാന്റ് നെയ്ന്‍, റോബസ്റ്റ എന്നിവയാണ് ഇവിടെ നിന്നും പരീക്ഷണാടിസ്ഥാനത്തില്‍ ഉല്‍പ്പാദിപ്പിച്ച് വിതരണം ചെയ്തിരുന്നത്.
എന്നാല്‍ കര്‍ഷകരുടെ വര്‍ദ്ധിച്ച ആവശ്യം നേന്ത്ര ഇനത്തില്‍ പെട്ട വാഴകള്‍ക്കായതിനാല്‍ കഴിഞ്ഞ വര്‍ഷമാണ് നേന്ത്രന്‍ ഉല്‍പ്പാദിപ്പിച്ചു തുടങ്ങിയത്.  
  നാടന്‍ നേന്ത്രവാഴ കാമ്പ്, കന്ന് എന്നീ ഭാഗങ്ങളില്‍ നിന്നാണ് തൈകള്‍ ഉല്‍പ്പാദിപ്പിക്കാനുള്ള കോശം എടുക്കുന്നത്. ഈ സസ്യഭാഗത്തിന് അന്നജം നല്‍കി വളര്‍ത്തി വേരുപിടിക്കുന്നതുവരെ ഒരു ശിശുവിന് നല്‍കുന്നതിനേക്കാള്‍ പരിചരണമാണ് നല്‍കുന്നത്. കാര്‍ബൈഡ്, വിറ്റാമിനുകള്‍, ഹോര്‍മോണ്‍ തുടങ്ങി ഖരരൂപത്തിലുള്ള ആഹാരത്തിലാണ് കള്‍ച്ചര്‍ വളരുക.
 കോശങ്ങള്‍ വളര്‍ത്തി തൈകള്‍ക്ക് വേരുപിടിപ്പിക്കുന്നത് അവസാനഘട്ടത്തിലാണ്. എല്ലാം സാങ്കേതിക വിദ്യകളും പൂര്‍ത്തിയാക്കി പാകമായ ഒരു വാഴത്തൈ കര്‍ഷകന് ലഭിക്കുമ്പോഴേക്കും ഒരു വര്‍ഷത്തെ പരിചരണം കഴിഞ്ഞിരിക്കും.
ഒരു മുകുളത്തില്‍ നിന്ന് 2000 മുതല്‍ 2500 വരെ തൈകള്‍ ഉദ്പാദിപ്പിച്ചെടുക്കാമെന്ന് ലാബിന്റെ ചുമതലയുള്ള കൃഷി ഓഫിസര്‍ പി.സതീശന്‍ പറഞ്ഞു. പ്രതിമാസം 20,000 വാഴകളാണ് ഉദ്പാദന ലക്ഷ്യം. ഈ വര്‍ഷം നേന്ത്രന് പുറമെ റോബസ്റ്റ, ഗ്രാന്റ് നെയിന്‍ എന്നിവയും വിതരണത്തിന് തയ്യാറായിട്ടുണ്ട്.
പൂവന്‍ വാഴ, കറിവേപ്പില, പൈനാപ്പിള്‍ എന്നിവയുടെ ടിഷ്യു തൈകള്‍ ഉല്‍പാദിപ്പിക്കാനുള്ള ശ്രമങ്ങള്‍ നടന്നുവരികയാണ്. കരിമ്പം ഫാമിന്റെ വില്‍പ്പന കൗണ്ടര്‍ വഴിയും, കണ്ണൂര്‍ ജില്ലാപഞ്ചായത്ത് ഓഫിസിനു മുന്നിലെ മൊബൈല്‍ വിപണ കേന്ദ്രം വഴിയും വാഴത്തൈകള്‍ വിതരണം ചെയ്യും.