ബാക്കു: റഷ്യന്‍ പിന്തുണയോടെ യാഥാര്‍ഥ്യമായ അര്‍മേനിയ-അസര്‍ബൈജാന്‍ സമാധാന കാരാറിന്റെ തുടര്‍ച്ചയായി അര്‍മേനിയ മൂന്നു ജില്ലകള്‍ തങ്ങള്‍ക്ക് കൈമാറിയതായി അസര്‍ബൈജാന്‍ പ്രതിരോധ മന്ത്രാലയം അറിയിച്ചു. അര്‍മേനിയന്‍ വിഘടനവാദികള്‍ 30 വര്‍ഷമായി കൈവശംവച്ച ജില്ലകളിലേക്ക് അസര്‍ബൈജാന്‍ സൈന്യത്തിന്റെ ഒരു യൂണിറ്റ് പ്രവേശിച്ചതായും മന്ത്രാലയം വെളിപ്പെടുത്തി. ഇരു രാജ്യങ്ങള്‍ക്കുമിടയില്‍ വര്‍ഷങ്ങളായി തര്‍ക്കം നിലനില്‍ക്കുന്ന നഗര്‍ണോ കരാബാക് മേഖലയിലാണ് ഈ പ്രദേശങ്ങള്‍. ഇവയില്‍ ഉള്‍പ്പെട്ട ജില്ലയായ അഗ്ദമില്‍ പ്രവേശിച്ചതായി അസര്‍ബൈജാന്‍ സൈന്യവും അറിയിച്ചു.
ഇരുരാജ്യങ്ങള്‍ക്കുമിടയില്‍ സംഘര്‍ഷം രൂക്ഷമായതോടെ നടന്ന പോരാട്ടത്തില്‍ അസര്‍ബൈജാന്‍ കൈയടക്കിയ നഗര്‍ണോ കരാബാക് മേഖലയുടെ 20 ശതമാനം പ്രദേശം അവര്‍ക്ക് വിട്ടുകൊടുക്കാന്‍ അര്‍മേനിയ സമ്മതിച്ചിരുന്നു. ചരിത്ര നഗരമായ ഷുഷയും ഇതില്‍ ഉള്‍പ്പെടും. സമാധാന കരാര്‍ പ്രകാരം കല്‍ബജാര്‍ ജില്ല 25നും ലാച്ചിന്‍ ജില്ല ഡിസംബര്‍ ഒന്നിനും അസര്‍ബൈജാന് കൈമാറും. തങ്ങള്‍ താമസിച്ച വീടുകളും മറ്റു കെട്ടിടങ്ങളുമെല്ലാം മടങ്ങും മുന്‍പ് തകര്‍ത്താണ് അര്‍മേനിയക്കാര്‍ പിന്‍വാങ്ങുന്നതെന്നാണ് രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്യുന്നത്.