കരുവാരക്കുണ്ട്: മാമ്പുഴ പടുമുണ്ടയിലെ യഅഖൂബ് മുസ്‌ലിയാരുടെ കുടുംബത്തിന് വീടൊരുങ്ങുന്നു. താഇഫ് കെ.എം.സി.സിയാണ് വീടു നിര്‍മിച്ചുനല്‍കുന്നത്. അവശത അനുഭവിക്കുന്ന യഅഖൂബ് മുസ്‌ലിയാരുടെ കുടുബം ഒന്‍പത് അംഗങ്ങളുള്ളതാണ്.
ഇവര്‍ക്കെല്ലാം നിത്യവൃത്തിക്കുള്ളത് മദ്‌റസാ അധ്യാപകനായ യഅഖൂബ് ഫൈസി മാത്രം.മാനസികമായും ശാരീരികമായും കഷ്ടപ്പെടുന്ന ഈ കുടുംബം വര്‍ഷങ്ങളായി താമസിച്ചിരുന്ന വീട് തകര്‍ച്ചയുടെ വക്കിലെത്തിയതോടെ പൊളിച്ചുമാറ്റല്‍ നിര്‍ബന്ധമായി.
പൊളിച്ച സ്ഥലത്ത് വീട് വയ്ക്കാന്‍ സാധിക്കാതെ ചോര്‍ന്നൊലിക്കുന്ന ഷെഡിലാണ് ഇത്രകാലം താമസിച്ചത്. കുടുംബത്തിന്റെ കഷ്ടത മനസിലാക്കിയ നാട്ടുകാരാണ് സഹായ സമിതിക്ക് രൂപം നല്‍കി വീടിനായുള്ള ശ്രമങ്ങള്‍ ആരംഭിച്ചത്. സയ്യിദ് മുനവ്വറലി ശിഹാബ് തങ്ങള്‍ ഇന്ന് തറക്കല്ലിടും.