തിരുവനന്തപുരം: പണിമുടക്കുമായി മുന്നോട്ടുപോകാന്‍ കെ.എസ്.ആര്‍.ടി.സി സംയുക്ത തൊഴിലാളി യൂനിയന്‍ സംസ്ഥാന കണ്‍വന്‍ഷന്‍ തീരുമാനിച്ചു. പണിമുടക്കിനു ജനകീയ പിന്തുണ വര്‍ധിപ്പിക്കുന്നതിന്റെ ഭാഗമായി 26, 27, 28 തിയതികളില്‍ സംസ്ഥാന വ്യാപകമായി പ്രചാരണ ജാഥകള്‍ സംഘടിപ്പിക്കും. നാലു മേഖലകളായി തിരിച്ചു നടത്തുന്ന ജാഥകള്‍ സംസ്ഥാനത്തെ എല്ലാ ഡിപ്പോകളിലും എത്തിച്ചേരും. എം.ഡി സ്ഥാനത്തുനിന്നു ടോമിന്‍ തച്ചങ്കരിയെ മാറ്റണമെന്നു സി.ഐ.ടി.യു സംസ്ഥാന കമ്മിറ്റി സര്‍ക്കാരിനോട് ആവശ്യപ്പെട്ടു. പണിമുടക്കിനു നോട്ടിസ് നല്‍കിയ സാഹചര്യത്തില്‍ മുഖ്യമന്ത്രി ചര്‍ച്ചയ്ക്കു വിളിക്കുമെന്നാണ് യൂനിയനുകളുടെ പ്രതീക്ഷ.