മാഡ്രിഡ്: ക്ലബ് ഫുട്‌ബോളില്‍ റയല്‍ മാഡ്രിഡ്, അത്‌ലറ്റികോ മാഡ്രിഡ്, ബയേണ്‍ മ്യൂണിക്ക്, പി.എസ്.ജി, ഇന്റര്‍ മിലാന്‍ എന്നീ ടീമുകള്‍ ജയം തുടര്‍ന്നപ്പോള്‍ ചെല്‍സിക്ക് സമനിലക്കുരുക്ക്.
സ്പാനിഷ് ലീഗില്‍ മുന്‍ ചാംപ്യന്മാരായ റയല്‍ മാഡ്രിഡ് എസ്പാന്യോളിനെ എതിരില്ലാത്ത ഒരു ഗോളിന് പരാജയപ്പെടുത്തിയപ്പോള്‍ അത്‌ലറ്റികോ മാഡ്രിഡ് 2-0ത്തിന് ഗെറ്റാഫയെ തകര്‍ത്തു. 41ാം മിനുട്ടില്‍ മാര്‍കോ അസെന്‍സിയോ നേടിയ ഗോളിലാണ് റയലിന്റെ വിജയം. വാര്‍ റിവ്യൂവിലൂടെയാണ് അസെന്‍സിയോയുടെ ഗോളുറപ്പിച്ചത്.
വിജയത്തോടെ നിലവിലെ ചാംപ്യന്‍മാരായ ബാഴ്‌സലോണയെ പിന്തള്ളി റയല്‍ പോയിന്റ് പട്ടികയില്‍ ഒന്നാം സ്ഥാനത്തേക്ക് കയറി. അഞ്ച് മത്സരങ്ങളില്‍നിന്ന് 13 പോയിന്റുമായാണ് റയല്‍ പട്ടികയില്‍ ഒന്നാം സ്ഥാനത്തെത്തിയത്. ഒരു മത്സരം കുറച്ചു കളിച്ച ബാഴ്‌സ 12 പോയിന്റുമായി രണ്ടാമതാണ്. റയലിനെതിരേ എസ്പാന്യോള്‍ മികച്ച പ്രകടനം പുറത്തെടുത്തെങ്കിലും ഗോള്‍കീപ്പര്‍ കുര്‍ട്ടോയിസിന്റെ രക്ഷപ്പെടുത്തലുകള്‍ റയലിന് തുണയാവുകയായിരുന്നു.
14, 60 മിനുട്ടുകളില്‍ നേടിയ ഗോളിലായിരുന്നു അത്‌ലറ്റികോയുടെ വിജയം. തോമസ് ലെമറാണ് ആദ്യത്തെ ഗോളിന് വഴിയൊരുക്കിയും രണ്ടാമത്തെ ഗോളടിച്ചും അത്‌ലറ്റികോയെ അനായാസ ജയത്തിലെത്തിച്ചത്. 67ാം മിനുട്ടില്‍ ഇവാന്‍ അലെജോ ചുവപ്പ് കാര്‍ഡ് കണ്ടതിനെ തുടര്‍ന്ന് 10 പേരുമായാണ് ഗെറ്റാഫെ മത്സരം പൂര്‍ത്തിയാക്കിയത്.
വിജയത്തോടെ പോയിന്റ് പട്ടികയില്‍ അഞ്ചാം സ്ഥാനത്തേക്ക് മുന്നേറാനും അത്‌ലറ്റികോ മാഡ്രിഡിന് കഴിഞ്ഞു. മറ്റൊരു മത്സരത്തില്‍ സെവിയ്യ 6-2ന് ലെവാന്റെയെ പരാജയപ്പെടുത്തി.

ബയേണിന് ജയം; ഡോര്‍മുണ്ടിന് സമനില
ജര്‍മന്‍ ബുണ്ടസ്‌ലിഗയില്‍ നിലവിലെ ചാംപ്യന്മാരായ ബയേണ്‍ മ്യൂണിക്ക് എതിരില്ലാത്ത രണ്ട് ഗോളുകള്‍ക്ക് ഷാല്‍ക്കെയെ തകര്‍ത്തപ്പോള്‍ കരുത്തരായ ബൊറൂസിയ ഡോര്‍ട്മുണ്ടിനെ ഹോഫന്‍ഹേം സമനിലയില്‍ തളച്ചു. എട്ടാം മിനുട്ടില്‍ റോഡ്രിഗസും 64ാം മിനുട്ടില്‍ പെനാല്‍റ്റിയിലൂടെ ലെവന്‍ഡോവ്‌സ്‌കിയുമാണ് ബയേണിന്റെ ഗോളുകള്‍ നേടിയത്. നാല് മത്സരങ്ങളില്‍ നിന്ന് 12 പോയിന്റുമായി ബയേണ്‍ തന്നെയാണ് പോയിന്റ് പട്ടികയില്‍ ഒന്നാം സ്ഥാനത്ത്. 44ാം മിനുട്ടില്‍ ജോയിലിന്റണിലൂടെ മുന്നിലെത്തിയ ഹോഫന്‍ഹേമിനെ 84ാം മിനുട്ടില്‍ പുലിസിച്ച് നേടിയ ഗോളിലാണ് ഡോര്‍ട്മുണ്ട് സമനിലയില്‍ പിടിച്ചത്.
സമനിലക്കുരുക്കില്‍ ചെല്‍സി
ഇംഗ്ലിഷ് പ്രീമിയര്‍ ലീഗില്‍ ചെല്‍സിക്ക് സമനില. ഇന്നലെ നടന്ന മത്സരത്തില്‍ വെസ്റ്റ്ഹാം യുനൈറ്റഡാണ് ചെല്‍സിയെ ഗോള്‍രഹിത സമനിലയില്‍ തളച്ചത്. ഇത് പോയിന്റ് ടേബിളില്‍ ചെല്‍സിക്ക് തിരിച്ചടിയായി. ആറ് മത്സരങ്ങളില്‍നിന്ന് 16 പോയിന്റുമായി പട്ടികയില്‍ മൂന്നാം സ്ഥാനത്താണ് ചെല്‍സി. മറ്റൊരു മത്സരത്തില്‍ ടോട്ടന്‍ഹാം ഹോട്‌സ്പര്‍ 2-1ന് ബ്രൈറ്റണിനെ പരാജയപ്പെടുത്തി.

പി.എസ്.ജി പൊരുതി നേടി
ഫ്രഞ്ച് ലീഗില്‍ പി.എസ്.ജി പൊരുതി ജയിച്ചു. ഒന്നിനെതിരേ മൂന്ന് ഗോളുകള്‍ക്ക് റെന്നസിനെയാണ് പി.എസ്.ജി തകര്‍ത്തുവിട്ടത്. 11ാം മിനുട്ടില്‍ റാബിയട്ടിന്റെ ഓണ്‍ഗോളില്‍ മുന്നിലെത്തിയ റെന്നസിനെ 45ാം മിനുട്ടില്‍ ഡി മരിയ നേടിയ ഗോളില്‍ ഒപ്പംപിടിച്ച പി.എസ്.ജി 61ാം മിനുട്ടില്‍ മ്യൂനിയറിലൂടെയും 83ാം മിനുട്ടില്‍ ചോപ്പോ മോട്ടിങിലൂടെയും ഗോള്‍ നേടി വിജയം സ്വന്തമാക്കുകയായിരുന്നു. കളിച്ച ആറു മത്സരങ്ങളിലും ജയിച്ച് 18 പോയിന്റുമായി പട്ടികയില്‍ ഒന്നാംസ്ഥാനത്താണ് പി.എസ്.ജി. മൊണാക്കോ നിമെസുമായി 1-1 സമനിലയില്‍ പിരിഞ്ഞു.

ഇന്‍ജുറി ടൈമില്‍
ജയം നേടി ഇന്റര്‍ മിലാന്‍
ഇറ്റാലിയന്‍ സീരി എയില്‍ ഇന്റര്‍ മിലാന് ജയം. സാംപ്‌ഡോറിയക്കെതിരേ 94ാം മിനുട്ടില്‍ ബ്രോസോവിച്ച് നേടിയ ഗോളിലാണ് ഇന്റര്‍ രക്ഷപ്പെട്ടത്. അതേസമയം, കരുത്തരായ റോമ ഈ സീസണില്‍ മോശം ഫോം തുടരുകയാണ്. ഇന്നലെ ബൊലോഗ്‌നയെ നേരിട്ട റോമ എതിരില്ലാത്ത രണ്ടുഗോളുകള്‍ക്ക് പരാജയപ്പെട്ടു. റോമയുടെ തുടര്‍ച്ചയായ മൂന്ന് എവേ പരാജയമായി ഇത്. 2013ന് ശേഷം ആദ്യമായാണ് റോമ തുടര്‍ച്ചയായി മൂന്ന് എവേ മത്സരങ്ങള്‍ തോല്‍ക്കുന്നത്. 36ാം മിനുട്ടില്‍ മറ്റിയെല്ലോയും 59ാം മിനുട്ടില്‍ സാന്റന്ററുമാണ് ബൊലോഗ്നയുടെ ഗോളുകള്‍ നേടിയത്. പോയിന്റ് പട്ടികയില്‍ 12ാം സ്ഥാനത്താണ് റോമ.