തൃക്കരിപ്പൂര്‍: 44ാമത് സംസ്ഥാന ജൂനിയര്‍ ഫുട്‌ബോള്‍ ചാംപ്യന്‍ഷിപ്പ് കിരീടം മലപ്പുറത്തിന്. ഇന്നലെ നടന്ന ഫൈനലില്‍ മുന്‍ ചാംപ്യന്മാരായ കോഴിക്കോടിനെ തോല്‍പ്പിച്ചാണ് മലപ്പുറം കിരീടം ഉയര്‍ത്തിയത്. ടൈ ബ്രേക്കറിലായിരുന്നു മലപ്പുറത്തിന്റെ വിജയം. നിശ്ചിത സമയത്ത് 1-1 എന്ന നിലയിലായിരുന്നതിനാല്‍ ടൈ ബ്രേക്കറില്‍ 8 -7 എന്ന സ്‌കോറിനായിരുന്നു മലപ്പുറത്തിന്റെ വിജയം. ലൂസേഴ്‌സ് ഫൈനലില്‍ വയനാടിനെ ഒരു ഗോളിന് തകര്‍ത്ത് എറണാകുളം മൂന്നാംസ്ഥാനം സ്വന്തമാക്കി.
മികച്ച കളിക്കാരനായി മലപ്പുറത്തിന്റെ ഹാറൂണ്‍ റഷീദിനെ തിരഞ്ഞെടുത്തു. അനുരാജ് കോഴിക്കോട് (ടോപ്പ് സ്‌കോറര്‍), ആശിഷ് കാസര്‍കോട് (ഗോള്‍ കീപ്പര്‍), വിവേക് കോഴിക്കോട് (പ്രതിരോധം), ആദില്‍ അമല്‍ മലപ്പുറം (മധ്യനിര), അനന്തകുമാര്‍ കോഴിക്കോട് (മുന്നേറ്റ നിര) എന്നിവരെ തിരഞ്ഞെടുത്തു. വിജയികള്‍ക്കുള്ള ട്രോഫികള്‍ റവന്യൂ മന്ത്രി ഇ. ചന്ദ്രശേഖരന്‍, കേരളാ ഫുട്‌ബോള്‍ അസോസിയേഷന്‍ സെക്രട്ടറി പി. അനില്‍ കുമാര്‍ എന്നിവര്‍ വിതരണം ചെയ്തു.