കൊപ്പം: റമദാനോടനുബന്ധിച്ച് സമസ്തക്ക് കീഴിലുള്ള പതിനായിരത്തോളം മദ്‌റസകള്‍ ഇന്ന് അടക്കും. ഹിജ്‌റ വര്‍ഷ കലണ്ടര്‍ പ്രകാരം ശവ്വാല്‍ മുതല്‍ ശഅബാന്‍ വരെയാണ് മദ്‌റസ വര്‍ഷം. കഴിഞ്ഞ ചൊവ്വാഴ്ച്ച ആരംഭിച്ച വാര്‍ഷിക പരീക്ഷ ഇന്നത്തോടെ അവസാനിക്കും. അഞ്ച്, ഏഴ്, പത്ത്, പ്ലസ് ടു ക്ലാസുകളുടെ പൊതുപരീക്ഷ മെയ് ആദ്യവാരത്തില്‍ നടന്നിരുന്നു. റമദാനോടനുബന്ധിച്ച്  റൈഞ്ച് മാനേജ്‌മെന്റ് കമ്മിറ്റികളുടെ നേതൃത്വത്തില്‍ അധ്യാപകര്‍ക്കും കുടുംബത്തിനും ഭക്ഷ്യ വിഭവങ്ങളടങ്ങിയ റമദാന്‍കിറ്റുകള്‍ തയ്യാറാക്കിയിട്ടുണ്ട്. തിരുവേഗപ്പുറ റൈഞ്ച് ജംഇയ്യത്തുല്‍ മുഅല്ലിമീന്‍ റിലീഫ് സെല്‍ റൈഞ്ചിലെ അര്‍ഹരായ 82 മുഅല്ലിംങ്ങള്‍ക്ക് റമദാന്‍ കിറ്റുകള്‍ വിതരണം ചെയ്തു .മുഫത്തിഷ് എന്‍.കെ. മുഹമ്മദ് മുസ്ലിയാര്‍ ഉദ്ഘാടനം നിര്‍വഹിച്ചു .  റൈഞ്ച് പ്രഡിഡണ്ട് ഉമര്‍ മുസ്ലിയാര്‍ അധ്യക്ഷനായി. സെക്രട്ടറി ജലീല്‍ ഫൈസി, നൗഷാദ് അന്‍വരി, നാസറുദ്ധീന്‍ മുസ്ലിയാര്‍, റൈഞ്ച് മാനേജ്‌മെന്റ് കമ്മിറ്റി ട്രഷര്‍ സമദ് മാസ്റ്റര്‍ പൈലിപ്പുറം,അമാനുള്ള മൗലവി പ്രസംഗിച്ചു.
 എടപ്പലം റൈഞ്ച്  സംഘടിപ്പിച്ച മദ്‌റസ അധ്യാപകര്‍ക്കുള്ള റമദാന്‍ കിറ്റ് വിതരണവും സമസ്ത ഇസ്ലാമിക കലാമേളയില്‍ സബ്ജുനിയര്‍ മലയാളഗാന മത്സരത്തില്‍ ഒന്നാം സ്ഥാനം നേടിയ മൂര്‍ക്കനാട് ദാറുല്‍ ഉലൂം മദ്‌റസയിലെ മുഹമ്മദ് ശാമിലിനുള്ള അനുമോദനവും പി.ടി.എം. യതീംഖാന മദ്‌റസയില്‍ വെച്ച് നടന്നു. മോളൂര്‍ റൈഞ്ചിന്റെ കീഴില്‍ നടത്തുന്ന റിലീഫ് വിതരണം ഇന്ന് ഉച്ചക്ക് രണ്ട് മണിക്ക് മേലെ പൊട്ടച്ചിറ നുസ്‌റത്തുല്‍ ഇസ്ലാം മദ്‌റസയില്‍ നടത്തും.