പാലക്കാട്:ജില്ലയിലെ എല്‍.പി. സ്‌കൂള്‍ വിദ്യാര്‍ഥികള്‍ക്ക് സൗജന്യമായി കൈത്തറി സ്‌കൂള്‍ യൂനിഫോം നല്‍കുന്ന പദ്ധതിയുടെ ഉദ്ഘാടനം മെയ് 22 ന് വൈകീട്ട് നാലിന് മോയന്‍ എല്‍.പി. സ്‌കൂളില്‍ നടക്കും.  ജില്ലാ പഞ്ചായത്ത് പ്രസിഡന്റ്  കെ ശാന്തകുമാരി  ജില്ലാ വിദ്യാഭ്യാസ ഓഫീസര്‍ എം. ആര്‍ രോഹിണിക്ക് യൂനിഫോം നല്‍കി ഉദ്ഘാടനം നിര്‍വഹിക്കും.  വാര്‍ഡ് കൗണ്‍സിലര്‍ എ എം ഹസീല അധ്യക്ഷയാവും .  
കൈത്തറി മേഖലയുടെ സമഗ്ര പുരോഗതിക്കും തൊഴിലാളികള്‍ക്ക് കൂലി ഉറപ്പാക്കുന്നതിനുമായി സംസ്ഥാന സര്‍ക്കാര്‍ ആവിഷ്‌ക്കരിച്ചതാണ് സൗജന്യ സ്‌കൂള്‍ യൂനിഫോം പദ്ധതി.  ജില്ലയിലെ 196 സ്‌കൂളുകളിലെ 17333 കുട്ടികള്‍ക്കാണ് കൈത്തറി യൂനിഫോം സൗജന്യമായി നല്‍കുക.   ഇതിനായി 14458 മീറ്റര്‍ സ്യൂട്ടിങ്ങ് തുണിത്തരങ്ങളും 18673 മീറ്റര്‍ ഷര്‍ട്ടിങ്് തുണിത്തരങ്ങളും തയ്യാറായതായി ജില്ലാ വ്യവസായ കേന്ദ്രം ജനറല്‍ മാനേജര്‍ ജി.  രാജ്‌മോഹന്‍ അറിയിച്ചു. ജില്ലാ വ്യവസായ കേന്ദ്രത്തിന്റെ നേതൃത്വത്തിലാണ് ഇതിനാവശ്യമായ പ്രവര്‍ത്തനങ്ങള്‍ നടന്നത്.  അഞ്ച് കൈത്തറി സഹകരണ സംഘങ്ങളില്‍ നിന്നും 70 തൊഴിലാളികള്‍ ചേര്‍ന്ന് 11311 മീറ്റര്‍ തുണിയാണ് ജില്ലയില്‍ നെയ്തത് .  ബാക്കി ആവശ്യമായി വരുന്നവ ഹാന്‍വീവ് നല്‍കും.  യൂനിഫോമിന് ആവശ്യമായ കളര്‍ കോഡുകളും തിരഞ്ഞെടുത്ത് നല്‍കിയിട്ടുണ്ട്. തൊഴിലാളികള്‍ അവധി ദിവസങ്ങള്‍പോലും ഉപയോഗപ്പെടുത്തിയാണ് കുട്ടികള്‍ക്ക് ആവശ്യമായ തുണി നെയ്‌തെടുത്തത്.
നെയ്ത തുണി തമിഴ്‌നാട്ടിലെ ഡൈയിങ്് യൂനിറ്റുകളില്‍ എത്തിച്ചാണ് കളര്‍ ചെയ്തത്.  ജില്ലയില്‍ ഇതിന്റെ ചുമതല നിര്‍വഹിച്ചത് ഹാന്‍വീവാണ്.  ഓരോ സ്‌കൂളിനും ആവശ്യമായ തുണി പ്രത്യേകം പാക്കറ്റിലാക്കുന്ന ജോലിയും പുരോഗമിച്ചുവരികയാണ്.  വിദ്യാഭ്യാസ ഡെപ്യൂട്ടി ഡയറക്ടര്‍മാര്‍ എ.ഇ.ഒ. മാര്‍ക്കാണ് യൂനിഫോം തുണി കൈമാറുക.  സ്‌കൂളുകളിലേക്കുളള വിതരണം എ.ഇ.ഒ. മാരുടെ നേതൃത്വത്തില്‍ നടക്കും.  അടുത്ത ആഴ്ചയോടെ അര്‍ഹരായ എല്ലാ കുട്ടികള്‍ക്കും കൈത്തറി യൂനിഫോം വിതരണം ചെയ്യാന്‍ കഴിയും.
ജില്ലാ വ്യവസായ കേന്ദ്രം ജനറല്‍ മാനേജര്‍ ജി.രാജ്‌മോഹന്‍ ,പ്രധാനാധ്യാപിക കെ മണിയമ്മ, ജില്ലാ വ്യവസായ കേന്ദ്രം മാനേജര്‍ വി കെ ജോസഫ്, ഡെപ്യൂട്ടി രജിസ്ട്രാര്‍ ആര്‍ സുരേഷ് ബാബു, മാറലാട് കൈത്തറി സഹകരണ സംഘം സെക്രട്ടറി രാമസ്വാമി, പി.ടി.എ. പ്രസിഡന്റ് എന്നിവര്‍ ഉദ്ഘാടന പരിപാടിയില്‍ പങ്കെടുക്കും.