കല്‍പ്പറ്റ: മുത്തങ്ങ സമരത്തില്‍ പങ്കെടുത്ത 295 ആദിവാസി കുടുംബങ്ങള്‍ക്ക് കൈവശരേഖ നല്‍കിയെങ്കിലും ഭൂമി കൊടുത്തിട്ടില്ലെന്ന് ആദിവാസി ഗോത്രമഹാസഭ ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. മുത്തങ്ങ സമരത്തില്‍ പങ്കെടുത്ത ആദിവാസികള്‍ക്ക് വേണ്ടി 162 ദിവസം നീണ്ടുനിന്ന നില്‍പ്പുസമരത്തിലൂടെ തയാറാക്കിയ പാക്കേജാണ് സര്‍ക്കാര്‍ നടപ്പിലാക്കേണ്ടത്. പാക്കേജ് പ്രകാരം ഒരു കുടുംബത്തിന് ഒരേക്കറും മുത്തങ്ങ സമരവുമായി ബന്ധപ്പെട്ട് ജയില്‍ ശിക്ഷ അനുഭവിച്ച കുട്ടികള്‍ക്ക് ഒരു ലക്ഷം രൂപ നഷ്ടപരിഹാരം കൊടുക്കാനും തീരുമാനമുണ്ടായി. കഴിഞ്ഞ ജനുവരി 22ന് മുന്‍ മുഖ്യമന്ത്രി ഉമ്മന്‍ചാണ്ടി 24 കുടുംബങ്ങള്‍ക്കാണ് കൈവശരേഖ നല്‍കിയത്. പിന്നീട് ഇതില്‍ യാതൊരു നടപടിയും എടുത്തില്ല. മനുഷ്യവകാശ കമ്മിഷന്റെ റിപ്പോര്‍ട്ടനുസരിച്ച് സമരത്തില്‍ പങ്കെടുത്ത് ജയില്‍ ശിക്ഷ അനുഭവിച്ചത് 127 കുട്ടികളാണ്. ഇതില്‍ 27 കുട്ടികള്‍ക്കു മാത്രമെ നഷ്ടപരിഹാരത്തുക പൂര്‍ണമായി ലഭിച്ചുള്ളു.
 വാര്‍ത്താസമ്മേളനത്തില്‍ ഗോത്രമഹാസഭ സംസ്ഥാന അധ്യക്ഷ സി.കെ ജാനു, സംസ്ഥാന ജനറല്‍ സെക്രട്ടറി ബിജു കാക്കത്തോട്, വയനാട് ജില്ല സെക്രട്ടറി ബാബു കാര്യമ്പാടി, ജില്ലാ വൈസ് പ്രസിഡന്റ് അജിത, സംസ്ഥാന ട്രഷര്‍ ബാബു കുറ്റിമൂല, ഗോപാലന്‍ കാര്യമ്പാടി, പുഷ്പ രാജന്‍ നീര്‍വാരം, വെള്ള മാനന്തവാടി, ദേവി തിരുനെല്ലി എന്നിവര്‍ പങ്കെടുത്തു.