മുംബൈ: മയക്കുമരുന്ന് ഉപയോഗിച്ച കേസില്‍ പ്രമുഖ ഹാസ്യതാരം ഭാര്‍തി സിങ്ങിന്റെ ഭര്‍ത്താവിനേയും നാര്‍ക്കോട്ടിക്‌സ് കണ്‍ട്രോള്‍ ബ്യൂറോ (എന്‍.സി.ബി) അറസ്റ്റ് ചെയ്തു. 15 മണിക്കൂര്‍ നീണ്ട ചോദ്യം ചെയ്യലിന് ശേഷം ഞായറാഴ്ച രാവിലെയാണ് ഹര്‍ഷ് ലിമ്പാച്ചിയയെ അറസ്റ്റ് ചെയ്തത്. ശനിയാഴ്ച ഭാര്‍തി സിങ്ങിനേയും എന്‍.സി.ബി അറസ്റ്റ് ചെയ്തിരുന്നു.

ഇന്നലെ അവരുടെ മുംബൈയിലെ വസതിയില്‍ എന്‍.സി.ബി നടത്തിയ റെയ്ഡിന് പിന്നാലെയാണ് അറസ്റ്റ് ചെയ്തത്. റെയ്ഡില്‍ വീട്ടില്‍ നിന്ന് മയക്കുമരുന്നുകള്‍ പിടിച്ചെടുത്തതായും ഭാര്‍തിയും ഭര്‍ത്താവ് ഹര്‍ഷ് ലിംബാച്ചിയയും മയക്കുമരുന്ന് ഉപയോഗിച്ചതായി സമ്മതിച്ചിട്ടുണ്ടെന്നും എന്‍.സി.ബി ഉദ്യോഗസ്ഥര്‍ പറഞ്ഞിരുന്നു.

ബോളിവുഡിലെ ലഹരിമരുന്ന് ഇടപാടുകളെക്കുറിച്ച് അന്വേഷിക്കുന്നതിന്റെ ഭാഗമായി എന്‍.സി.ബി സിനിമാ പ്രവര്‍ത്തകരുടെ വീടുകളിലും ഓഫിസുകളിലും വ്യാപകമായി റെയ്ഡ് നടത്തിവരികയാണ്. നടന്‍ സുശാന്ത് രജ്പുത്തിന്റെ ആത്മഹത്യയുമായി ബന്ധപ്പെട്ട അന്വേഷണമാണ് പിന്നീട് ബോളിവുഡിലെ ലഹരി മാഫിയയിലേക്കുകൂടി നീണ്ടത്.