കൊഴിഞ്ഞാമ്പാറ: ജില്ലയില്‍ നാളികേര സമ്പത്ത് ഏറെയുള്ള കിഴക്കന്‍മേഖലയുള്‍പ്പെടെയുള്ള തെങ്ങുകളില്‍ വെള്ളീച്ചരോഗം വ്യാപകമായത് കര്‍ഷകരെ കണ്ണീരിലാഴ്ത്തിയിരിക്കുകയാണ്. തെങ്ങുകള്‍ ഏറെയുള്ള കിഴക്കന്‍ മേഖലയായ കൊഴിഞ്ഞാമ്പാറ, ചിറ്റൂര്‍ മേഖലകളിലും വടക്കഞ്ചേരി മേഖലകളിലുമാണ് തെങ്ങുകളിലെ വെള്ളീച്ചരോഗം പടര്‍ന്നിരിക്കുന്നത്. ഇതോടെ നാളികേര ഉല്‍പാദനത്തിലും കുറവുണ്ടായത് കര്‍ഷകരെ ആശങ്കയിലാഴ്ത്തിയിട്ടുണ്ട്. തെങ്ങുകളിലെ ഓലകള്‍ക്കിടയിലായിട്ടാണ് വെള്ളീച്ചകള്‍ കൂടുകൂട്ടികഴിയുന്നതിനാല്‍ മഴയും വെയിലുമൊന്നും ഇവയെ ബാധിക്കാറില്ലെന്നാണ് കര്‍ഷകഭാഷ്യം. പൊടിപോലെ കാണപ്പെടുന്ന ഇത്തരം ഫംഗസുകള്‍ തെങ്ങുകള്‍ക്കുപുറമേ തോട്ടങ്ങളിലുള്ള വാഴയുള്‍പ്പെടെയുള്ള ഇടവിളകളിലും വ്യാപിക്കുന്നത് ഇവയുടെയും നാശത്തിന് കാരണമായിത്തീരുന്നു. കാലാവസ്ഥക്കനുസരിച്ച് ഓരോ മേഖലകളിലും വ്യത്യസ്ഥമായ രോഗലക്ഷണങ്ങളും രോഗങ്ങളുമാണ് വൃക്ഷങ്ങളില്‍ കാണപ്പെടുന്നതെന്നിരിക്കെ ഇതും കര്‍ഷകര്‍ക്ക് ദുരിതം തീര്‍ക്കുകയാണ്.
കിഴക്കന്‍മേഖലയ്ക്കു പുറമെ സമുദ്രനിരപ്പില്‍ നിന്നും ആയിരത്തിലധികം ഉയരമുള്ള വടക്കഞ്ചേരി പാലക്കുഴി മേഖലയിലും സമാനമായ രോഗം മൂലം കഴിഞ്ഞ രണ്ടു വര്‍ഷത്തിനകം രണ്ടായിരത്തിലധികം തെങ്ങുകളാണ് നശിച്ചതെന്നു കര്‍ഷകര്‍ പറയുന്നു. തെങ്ങുകളിലെ രോഗങ്ങളെപ്പറ്റി പഠിക്കാന്‍ കേന്ദ്രതോട്ടവിള ഗവേഷണകേന്ദ്രത്തിലെ ശാസ്ത്രജ്ഞര്‍ എത്തി തെങ്ങുകളിലെ രോഗങ്ങളെപ്പറ്റി പഠനം നടത്തിയിരുന്നു. എന്നാല്‍ പ്രദേശങ്ങളിലെ മണ്ണില്‍ ആവശ്യമായ മൂലകങ്ങളുടെ അഭാവമാണ് രോഗകാരണമെന്നാണ് ഒരു വിഭാഗത്തിന്റെ വിലയിരുത്തല്‍. വെള്ളീച്ചരോഗത്തിനുപുറമേ കാറ്റുവീഴ്ച്ച, കൊമ്പുചീയല്‍, ചെന്നീരൊലിവ്, കൊമ്പന്‍ചെല്ലി ആക്രമണം, മണ്ഡരി എന്നിവയും ജില്ലയിലെ കേരകര്‍ഷകര്‍ക്കു കാലങ്ങളായി ദുരിതം തീര്‍ക്കുകയാണ്. ശക്തമായ മഴ ലഭിച്ചാല്‍ വെള്ളീച്ചരോഗം ഇല്ലാതാവുമെന്നു വിദഗ്ദര്‍ പറയുമ്പോഴും ഇത്തവണത്തെ മഹാപ്രളയം കഴിഞ്ഞിട്ടും വെള്ളീച്ചരോഗവ്യാപനം കര്‍ഷകര്‍ക്കു മുന്നില്‍ ഉത്തരമില്ലാത്ത ചോദ്യമാവുകയാണ്. കാലാവസ്ഥാവ്യതിയാനവും വരള്‍ച്ചയുമെല്ലാം നേരത്തെ ദുരിതം വിതച്ച ജില്ലയിലെ നാളികേരസമ്പത്തിന് ഇത്തവണ അതിശക്തമായ മഴ ലഭിച്ചിട്ടും കരകയറാനാവാത്ത സ്ഥിതിയാണ്. ജില്ലയിലെ കേരകൃഷിയില്‍ ഇത്തരത്തില്‍ രോഗങ്ങള്‍ പടര്‍ന്നുപിടിക്കുന്നതോടെ നാളികേരസമ്പത്തില്‍ ഇടിവുണ്ടാവുന്നതിനു പുറമെ കര്‍ഷകരെയും കണ്ണീരണിയിച്ചിരിക്കുകയാണ്.