സുല്‍ത്താന്‍ ബത്തേരി: നൂല്‍പ്പുഴ ചെട്ട്യാലത്തൂരിനടുത്ത് പിടിയിലായ വേട്ട സംഘത്തെ കോടതിയില്‍ ഹാജരാക്കി 14 ദിവസത്തേക്ക് റിമാന്‍ഡ് ചെയ്തു. ആനയുടെ കൊലപാതകവുമായി ഇവര്‍ക്ക് ബന്ധമുണ്ടെന്ന് സൂചനയുണ്ട്. ഇവരെ ആയുധനിയമ പ്രകാരം പൊലിസും വന്യമൃഗങ്ങളെ വേട്ടയാടല്‍ നിയമ പ്രകാരം വനം വകുപ്പും കേസെടുത്തു. പ്രതികളില്‍ ആനയെ കൊന്നുവെന്ന് സംശയമുള്ളവരെ വനം വകുപ്പ് കസ്റ്റഡിയില്‍ വാങ്ങി ചോദ്യം ചെയ്യല്‍ തുടരും. ചൊവ്വാഴ്ച രാത്രിയാണ് ചെട്ട്യാലത്തൂരിന് സമീപം വനമേഖലയില്‍ നിന്നും ഇവരെ പിടികൂടിയത്. മലപ്പുറം, വയനാട് സ്വദേശികളായ ഏഴു പേരെയാണ് പിടിച്ചത്. രണ്ടു പേര്‍ ഓടി രക്ഷപ്പെട്ടു. ഇവര്‍ക്കായി ഊര്‍ജിത അന്വേഷണം നടത്തിവരികയാണ്. നാടന്‍ തോക്ക്, തിരകള്‍, കെണികള്‍, കത്തികള്‍, രണ്ട് വാഹനങ്ങള്‍ എന്നിവയും കസ്റ്റഡിയില്‍ എടുത്തിട്ടുണ്ട്.