കൊച്ചി: ഹൈക്കോടതിയിലെ ഗവ. പ്ലീഡര്‍ ധനേഷ് മാത്യു മാഞ്ഞൂരാന്‍ യുവതിയെ കടന്നുപിടിച്ചെന്ന് ദൃക്‌സാക്ഷിയുടെ മൊഴി.
എറണാകുളം എം.ജി റോഡില്‍ ഹോട്ടല്‍ നടത്തുന്ന ഷാജിയാണ് അന്വേഷണസംഘത്തിന് മൊഴിനല്‍കിയത്. യുവതി ബഹളംവച്ചപ്പോള്‍ മാഞ്ഞൂരാന്‍ രക്ഷപ്പെടാന്‍ ശ്രമിച്ചു. എന്നാല്‍, നാട്ടുകാര്‍ പിടികൂടി പൊലിസില്‍ ഏല്‍പ്പിക്കുകയായിരുന്നു.
തുടര്‍ന്ന് സംഭവസ്ഥലത്തെത്തിയ പൊലിസ് സംഘം മാഞ്ഞൂരാനോട് സൗഹൃദത്തോടെ പെരുമാറിയതിനാലാണ് ഈ വിവരങ്ങളൊന്നും വെളിപ്പെടുത്താതിരുന്നതെന്നും ഷാജി പറഞ്ഞു. കഴിഞ്ഞ 14നു രാത്രി ഏഴിന് എറണാകുളം കോണ്‍വെന്റ് ജങ്ഷനിലാണ് കേസിനാസ്പദമായ സംഭവം നടന്നത്.  
ഈ കേസ് മാധ്യമങ്ങള്‍ റിപ്പോര്‍ട്ട് ചെയ്യുന്നതുമായി ബന്ധപ്പെട്ടാണ് അഭിഭാഷകര്‍ ഹൈക്കോടതി ഉള്‍പ്പെടെയുള്ള കോടതികളില്‍ മാധ്യമപ്രവര്‍ത്തകര്‍ക്കെതിരേ അക്രമം അഴിച്ചുവിട്ടത്.