ലണ്ടന്‍: പുലിയായി വന്ന് എലിയായി മടങ്ങിയ വെസ്റ്റ് ഇന്‍ഡീസിന് ഇന്ന് മാനം കാക്കുന്ന പോരാട്ടം. ശ്രീലങ്കയേയാണ് വിന്‍ഡീസ് നേരിടുന്നത്. ഏഴ് മത്സരങ്ങള്‍ പൂര്‍ത്തിയായപ്പോള്‍ ഒന്നില്‍ മാത്രമാണ് വിന്‍ഡീസ് ജയിച്ചത്. ലോകോത്തര നിരയുമായെത്തിയ വിന്‍ഡീസ് നിരാശപ്പെടുത്തിയാണ് മടങ്ങുന്നത്. അഫ്ഗാനിസ്ഥാനെതിരേയുള്ള ഒരു മത്സരം കൂടി മാത്രമേ വിന്‍ഡീസിന് ഇനി ബാക്കിയുള്ളു. ടൂര്‍ണമെന്റില്‍നിന്ന് പുറത്തായതിനാല്‍ അവസാന മത്സരങ്ങളിലെങ്കിലും ജയിച്ച് മാനം കാത്ത് നാട്ടിലേക്ക് മടങ്ങാനുള്ള ഒരുക്കത്തിലാണ് വിന്‍ഡീസ്.
കഴിഞ്ഞ മത്സരത്തില്‍ ഇന്ത്യക്കെതിരേ 125 റണ്‍സിന്റെ തോല്‍വി നേരിട്ട വിന്‍ഡീസ് ഇന്ന് ലങ്കയെ തോല്‍പ്പിക്കാമെന്ന വിശ്വാസത്തിലാണ്. അതേസമയം, വിന്‍ഡീസിനെപ്പോലെ ലങ്കയും പ്രതീക്ഷയറ്റാണ് നില്‍ക്കുന്നത്. തുടര്‍ന്നുള്ള രണ്ട് മത്സരത്തിലും ജയിച്ചാല്‍ മാത്രമേ ലങ്കക്ക് സെമിയെ കുറിച്ച് ആലോചിക്കേണ്ടതുള്ളു. അവസാന മത്സരത്തില്‍ ദക്ഷിണാഫ്രിക്കയോട് പരാജയപ്പെട്ടതാണ് ലങ്കക്ക് തിരിച്ചടിയായത്. ഇന്നത്തേത് കൂടാതെ ലങ്കക്ക് ഇനി ഇന്ത്യക്കെതിരേയുള്ള ഒരു മത്സരം മാത്രമേ ബാക്കിയുള്ളു. ഏഴ് മത്സരം നേരിട്ട ലങ്ക രണ്ടെണ്ണത്തില്‍ ജയം സ്വന്തമാക്കുകയും മൂന്നെണ്ണത്തില്‍ തോല്‍ക്കുകയും ചെയ്തു. രണ്ടെണ്ണം മഴ കാരണം ഉപേക്ഷിക്കുകയും ചെയ്തു. ഇതായിരുന്നു ലങ്കയുടെ സ്വപ്നങ്ങള്‍ തുലാസിലാക്കിയത്.