ന്യൂഡല്‍ഹി: ജാതി അടിസ്ഥാനത്തില്‍ പിന്നോക്കാവസ്ഥ നിര്‍ണയിച്ചുകൊണ്ടുള്ള സംവരണം നിര്‍ത്തലാക്കണമെന്ന് ആവശ്യപ്പെട്ട് നായര്‍ സര്‍വിസ് സൊസൈറ്റി നല്‍കിയ ഹരജിയില്‍ ഇടപെടുന്നില്ലെന്ന് സുപ്രിം കോടതി. ഹരജിക്കാര്‍ക്ക് വേണമെങ്കില്‍ ഹൈക്കോടതിയെ സമീപിക്കാമെന്നും കോടതി പറഞ്ഞു. ഇതിന്റെ അടിസ്ഥാനത്തില്‍ എന്‍എസ്എസ് ഹരജി പിന്‍വലിച്ചു.

കേരളത്തിലെ നിലവിലുള്ള സംവരണരീതി സാമൂഹിക സാഹചര്യങ്ങളിലെ മാറ്റം കണക്കിലെടുത്തല്ല എന്ന വാദമുന്നയിച്ചാണ് എന്‍എസ്എസ് സുപ്രിം കോടതിയില്‍ ഹരജി നല്‍കിയത്.

ജാതി അടിസ്ഥാനത്തിലുള്ള സംവരണത്തിനു പകരം വര്‍ഗാടിസ്ഥാനത്തിലുള്ള സംവരണം നടപ്പാക്കണം, പിന്നോക്ക വിഭാഗക്കാരിലെ സംവരണത്തിന് അര്‍ഹതയുള്ളവരെ കണ്ടെത്തുന്നത്തിനുള്ള കേരളത്തിലെ നടപടികള്‍ തല്‍ക്കാലികമായി നിര്‍ത്തിവെയ്ക്കണം, കേരളത്തില്‍ സംവരണവുമായി ബന്ധപ്പെട്ട് പിന്നോക്കാവസ്ഥ എന്ന പ്രയോഗം പുനപ്പരിശോധിക്കണം, അര്‍ഹരായവര്‍ക്കുമാത്രം സംവരണം നല്‍കി അവസരസമത്വം ഉറപ്പുവരുത്തുംവിധം നിലവിലെ സംവിധാനത്തില്‍ മാറ്റംവരുത്തണം എന്നിങ്ങനെയുള്ള വാദങ്ങളാണ് എന്‍എസ്എസ് ഹരജിയില്‍ ഉന്നയിച്ചിരുന്നത്.