മട്ടന്നൂര്‍: കുവൈറ്റില്‍ നിന്നുള്ള ഇന്‍ഡിഗോ വിമാനം അഞ്ചര മണിക്കൂര്‍ വൈകിയതിനെ തുടര്‍ന്ന് കണ്ണൂര്‍ വിമാനത്താവളത്തില്‍ യാത്രക്കാര്‍ പ്രതിഷേധിച്ചു.
ഇന്നലെ വൈകിട്ട് 3.35ന് കുവൈറ്റില്‍ നിന്ന് കണ്ണൂരില്‍ എത്തേണ്ട വിമാനം രാത്രി ഒന്‍പതിനാണ് എത്തിയത്. വിമാനം വൈകുന്നത് മുന്‍കൂട്ടി അറിയിച്ചില്ലെന്ന് യാത്രക്കാര്‍ പറഞ്ഞു. സാങ്കേതിക തകരാറിനെ തുടര്‍ന്നാണ് വൈകിയതെന്നാണ് വിമാന കമ്പനിയുടെ വിശദീകരണം.
വൈകിട്ട് മൂന്ന് കഴിയുമ്പോഴാണ് ബന്ധുക്കളും വിവരം അറിയുന്നത്. അപ്പോഴേക്കും പലരും വിമാനത്താവളത്തിലേക്ക് പുറപ്പെട്ടിരുന്നു. ചിലര്‍ അഞ്ചര മണിക്കൂറും യാത്രക്കാരെ കാത്തുനില്‍ക്കേണ്ടി വന്നു.
കഴിഞ്ഞ ദിവസം ഹൈദരാബാദില്‍ നിന്നുള്ള ഗോ എയര്‍ വിമാനം ഒന്‍പത് മണിക്കൂര്‍ വൈകിയതിനെ തുടര്‍ന്ന് യാത്രക്കാരും ബന്ധുക്കളും വിമാനത്താവളത്തില്‍ ബഹളംവച്ചിരുന്നു.