സ്വന്തം ലേഖകന്‍
തിരുവനന്തപുരം: സര്‍ക്കാരിനെതിരേ എന്‍ഫോഴ്‌സ്‌മെന്റ് ഡയരക്ടറേറ്റ് വ്യാജ വാര്‍ത്തകള്‍ സൃഷ്ടിക്കുന്നുവെന്ന് ആരോപിച്ച് ധനമന്ത്രി തോമസ് ഐസക്. ഇതുമായി ബന്ധപ്പെട്ട തെളിവും അദ്ദേഹം പുറത്തുവിട്ടു. കിഫ്ബിയ്‌ക്കെതിരേ അന്വേഷണം തുടങ്ങിയെന്ന് ചൂണ്ടിക്കാട്ടി ഇ.ഡി മാധ്യമങ്ങള്‍ക്ക് നല്‍കിയ വാട്‌സ്ആപ്പ് സന്ദേശമാണ് മന്ത്രി വാര്‍ത്താസമ്മേളനത്തില്‍ പുറത്തുവിട്ടത്. 'ഇ.ഡിയുടെ റഡാറില്‍ കിഫ്ബിയുടെ മസാലാബോണ്ടും' എന്ന് പ്രത്യേകം എടുത്തുപറയുന്ന സന്ദേശമാണ് മന്ത്രി മാധ്യമങ്ങളെ കാണിച്ചത്. സി.എ.ജിയും ഇ.ഡിയും കേരളത്തിനെതിരായി നടത്തുന്ന ഗൂഢാലോചനയ്ക്ക് തെളിവാണിതെന്ന് മന്ത്രി പറഞ്ഞു.
ഇ.ഡിയുടെ നീക്കം സംസ്ഥാനത്തിന്റെ അധികാരത്തിനുമേലുള്ള കുതിരകയറ്റവും നിയമസഭയോടുള്ള അവഹേളനവുമാണ്. ഇതേക്കുറിച്ച് പ്രതിപക്ഷ നേതാവ് അഭിപ്രായം പറയണം. ഏത് യജമാനന്റെ നിര്‍ദേശമനുസരിച്ചായാലും ഇ.ഡിയുടെ ഈ ഭീഷണിയ്‌ക്കൊന്നും കേരളം വഴങ്ങില്ല.
റഡാറുംകൊണ്ട് കിഫ്ബിയ്ക്ക് ചുറ്റുംകറങ്ങുന്ന ഇ.ഡി ഉദ്യോഗസ്ഥരുടെ കാലു കുഴയുമെന്നല്ലാതെ ഈ കോപ്രായങ്ങളൊന്നും കണ്ട് ഇവിടെയാരും ഭയക്കില്ല. ഇ.ഡിയെന്നു കേള്‍ക്കുമ്പോള്‍ മുട്ടുവിറച്ച് സംഘ്പരിവാറിന്റെ ദയയ്ക്ക് യാചിക്കാനിറങ്ങുന്നവരെ ഇന്ത്യയില്‍ മറ്റെവിടെയെങ്കിലും കണ്ടേക്കാം. ഈ നാട്ടിലത് പ്രതീക്ഷിക്കരുതെന്നും ഐസക് പറഞ്ഞു.