മീനങ്ങാടി: മുഖംമൂടി ധരിച്ചെത്തിയ രണ്ടംഗസംഘം വീട്ടുകാരെ ചുറ്റികകൊണ്ട് അടിച്ചു പരുക്കേല്‍പ്പിച്ചു. കഴിഞ്ഞദിവസം രാത്രി 8.30ഓടെ മീനങ്ങാടി ചെണ്ടക്കുനി കാഞ്ഞിരകോലത്ത് ജോണിന്റെ(69) വീട്ടിലാണ് സംഭവം.
അക്രമികളുടെ കൈവശമുണ്ടായിരുന്ന ചുറ്റികകൊണ്ടുള്ള ആക്രമണത്തില്‍ ജോണിനും മകന്‍ ബിനു( 34), ബിനുവിെന്റ ഭാര്യ ജിബിത(29) എന്നിവര്‍ക്കും പരുക്കേറ്റു.
തലക്ക് ഗുരുതരമായി പരുക്കേറ്റ ജിബിതയെ പൊലിസെത്തിയാണ് ആശുപത്രിയിലേക്ക് മാറ്റിയത്. വീട്ടുകാര്‍ ഭക്ഷണം കഴിച്ചുകൊണ്ടിരിക്കുന്ന സമയത്താണ് വാതിലില്‍ മുട്ടുന്ന ശബ്ദം കേള്‍ക്കുന്നത്.
ബിനു വാതില്‍ തുറന്നയുടനെ മുഖംമൂടി ധരിച്ച രണ്ടുപേര്‍ മുളകുപൊടിയെറിഞ്ഞശേഷം ചുറ്റിക ഉപയോഗിച്ച് അടിക്കുകയായിരുന്നു.
 ബിനുവുമായി ഉന്തുതള്ളും നടക്കുന്നതിനിടയില്‍ ഓടിയെത്തിയ ജോണിനെയും ജിബിതയെയും ഇവര്‍ ആക്രമിച്ചു. തുടര്‍ന്നാണ് ജിബിതക്ക് തലക്കടിയേല്‍ക്കുന്നത്.
ജോണിന്റെ ഭാര്യ ഏലിയാമ്മ ഒച്ചവെച്ചെങ്കിലും അയല്‍വാസികള്‍ ഓടിയെത്തുന്നതിന് മുന്‍പെ അക്രമി സംഘം ചുവന്ന നാനോ കാറില്‍ രക്ഷപ്പെടുകയായിരുന്നു. സംഭവമറിഞ്ഞ് മീനങ്ങാടി പൊലിസ് സ്ഥലത്തെത്തി പരിശോധിച്ചു.
തലക്കടിയേറ്റ് ബോധരഹിതയായി ജിബിതയെ ആശുപത്രിയിലെത്തിച്ച് ചികിത്സ നല്‍കി.
കരുതിക്കൂട്ടി ആക്രമിക്കുകയെന്ന ഉദേശത്തോടെയാണ് സംഘമെത്തിയതെന്നാണ് സൂചന. സ്ത്രീകളുടെ മാലയോ മറ്റു ആഭരണങ്ങളോ മുഖംമൂടി സംഘം മോഷ്ടിക്കാന്‍ ശ്രമിച്ചിട്ടില്ല.
മോഷണ ശ്രമം നടന്നിട്ടില്ലെന്നും കേസെടുത്ത് അന്വേഷണം ആരംഭിച്ചതായും മീനങ്ങാടി പൊലിസ് പറഞ്ഞു.