മഞ്ചേരി: മഞ്ചേരിയിലെ മാലിന്യ സംസ്‌കരണ കൂട്ടായ്മയായ 'മാനിസ മഞ്ചേരിയുടെ'നേതൃത്വത്തില്‍  മൂന്നാംഘട്ട മാലിന്യ സംസ്‌കരണ  പ്രവര്‍ത്തനങ്ങള്‍ക്കു തുടക്കമായി. ഇതിന്റെ ഭാഗമായി മാലിന്യങ്ങള്‍ റീസൈക്ലിങ്  കേന്ദ്രത്തിലേക്ക് കയറ്റിയയച്ചു. നേരത്തെ നടന്ന സംസ്‌കരണ പ്രവര്‍ത്തനങ്ങളുടെ ഭാഗമായി വീടുകളില്‍ ഉപയോഗശേഷം  വൃത്തിയാക്കി വച്ച പ്ലാസ്റ്റിക്ക് മാലിന്യങ്ങളും പ്ലാസ്റ്റിക്കിതര മാലിന്യങ്ങളുമാണ്  ശേഖരിച്ചിരുന്നത്. മഞ്ചേരി ടൗണ്‍ വാര്‍ഡ്, അരുകിഴായ, കോവിലകംകുണ്ട്, വായപ്പാറപ്പടി, ശാന്തിഗ്രാമം തുടങ്ങിയ വാര്‍ഡുകളില്‍ നിന്നാണ് മാലിന്യങ്ങള്‍  ശേഖരിച്ചത്.
ഒന്നാംഘട്ട മാലിന്യസംസ്‌കരണ പ്രവര്‍ത്തനങ്ങള്‍ കഴിഞ്ഞ വര്‍ഷം ഒക്ടോബര്‍ രണ്ടിനും രണ്ടാംഘട്ടം  ഈവര്‍ഷം ജനുവരി ഒന്നിനും വിപുലമായി നടന്നിരുന്നു. മൂന്ന് ലോഡ് പ്ലാസ്റ്റിക്കിതര മാലിന്യങ്ങളും ഒന്നരലോഡ് വൃത്തിയാക്കിയ പ്ലാസ്റ്റിക്ക് മാലിന്യങ്ങളുമാണ് ഇന്നലെ കയറ്റിയയച്ചത്. ഇതില്‍ പ്ലാസിറ്റിക്കിതര മാലിന്യങ്ങള്‍ കര്‍ണാടകയിലെ  റീസൈക്ലിങ് കേന്ദ്രത്തിലേക്കും പ്ലാസ്റ്റിക്ക് മാലിന്യങ്ങള്‍ വളാഞ്ചേരിക്കടുത്തുള്ള റീസൈക്ലിങ് കേന്ദ്രത്തിലേക്കുമാണ് എത്തിച്ചിരിക്കുന്നത്.